ORMOC City, Leyte - Siyam ka tawo ang nasikop sa anti-illegal drug operation sa hiniusang pwersa sa Ormoc City Police ug Philippine Drug Enforcement Agency (PDEA)8 sa Purok 1, Barangay Naungan ning dakbayan.
Napuhag sa mga operatiba ang usa ka drug den ug nadakpan ang walo ka bisita ug ang nanag-iya niini.
Ang operasyon gilusad pasado alas 3 sa hapon, niadtong Biyernes, Hunyo 26, 2020.
Ang mga nasikop mao sila si Edgar Lumanta, Benjie Dalanun, Joven Sanoria, John Christian Christines ug ang tag-iya sa drug den nga si Abdul Sultan.
Lakip sa nadala sa mga operatiba ang laing upat ka mga babaye nga mibisita sa drug den.
Nasakmit sa kapulisan ang kapin kon kulang 11 gramos nga gituhoang shabu nga nagkantidad og P74,800.
Matod ni PDEA 8 Director Gilber Buenafe, dugay na nila gipanid-an ang ilegal nga kalihukan sa lugar.
Mihimo sila sa pagpaniid sa palibot gamit ang ilang asset ug sa nahisgutang adlaw gihimo ang buy bust.
Naaktohan sa mga operatiba ang mga bisita sa drug den nga nihimo og pot session.
Nakadawat usab og impormasyon ang PDEA 8 nga gawas sa pagka drug den, nahimo usab kini nga sex den diin kahuman og gamit sa shabu, ang mga babae na usab ang gamiton.
Si Ormoc City Mayor Richard Gomez uban nila ni City Councilors Goito Yrastorza ug Lalaine Marcos ang personal nga misusi sa operasyon.
Matod sa mayor, timailhan kini nga way lugar sa dakbayan ang mga ilegal nga aktibidad kay bisan sa ka-busy gumikan sa Covid-19, wa makalimot ang gobyerno sa pag-implementar sa ubang balaud.
Gihangyo sa mayor ang PDEA nga tabangan ang Ormoc sa padayung pag-monitor sa ilegal nga druga.
Ang dakbayan sa Ormoc nahimo nga labing unang drug free city sa Eastern Visayas atol sa paglingkod ni Gomez ug buot sa mayor nga magpabilin kini bisan sa giatubang nga krisis.
Dugang pa sa mayor ug mga awtoridad nga di pwede gamiton nga rason sa mga ilegalista ang kalisud hinungdan sa pagsud nila sa ilegal nga kalihukan.
Daghan nga mga paagi pa ang himuon aron mahaw-as sa kalisud.
Giangkon sa mga dinakpan ang kalapasan nga ilang nabuhat apan nihimakak nga ila ang drugas.
Matod sa mga dinakpan, igo ra sila gidad-an sa wa nila mailhi nga tawo nga dali milakaw human og hatud.
Ang kabanay sa usa sa mga dinakpan ang hilabihan ang nakahilak, syagit ug niyaka sa yuta ug gihimakak nga namaligya ang iyang igsuon og shabu.
Matod sa mga awtoridad, ilang girespito ang katungod sa mga dinakpan ug kabanay kay mamahimo sila nga makadepensa sa kaso sa korte.
Si Buenafe nagkanayon nga naa sila karoy giimbistigaran nga gigikanan sa druga apan nagdumili sa pagbutyag aron dili mapurnada ang ilang sunod nga operasyon sa gidiling drugas.
Naa na karon sa kustodiya sa PDEA 8 ang mga dinakpan ug giandam na ang kasong kalapasan sa (RA) Republic Act 9165 o Comprehensive Dangerous Drugs Act. (JKDP)