ALANG sa mga daghang reklamo sa pagpang-apod-apod sa Social Amelioration Program (SAP) gikan sa ahensya nga nag-emplementar niini, ang Department of Social Welfare and Development (DSWD) ug mga barangay kapitanes, dinhi ninyo ideretso ang inyong reklamo sa Digong 8888.
Gituyo kini pagdesinyo nga gikan mismo sa pinakaubos nga mga residente gikan sa atong mga barangay diretso sa Malakanyang ang inyong mulo o reklamo para diha-diha ang tubag o sulbad sa inyong problema.
Apan siguro-a lang nga ang inyong reklamo tinuod, ug dili tumotumo kay bumirang kini sa inyo. Sama sa usa ka solo parent nga nagreklamo nga naapil siya sa pagpanglista apan sa final validation gitaktak siya, ngano? Tungod kay nagdawat siya og binulan nga tabang gikan sa iyang amahan sa America, ug sa iyang igsuon gikan sa Canada.
Apan ang usa ka solo parent mi-insister nga kulang kuno ang iyang gidawat nga tabang matag bulan gikan sa America ug Canada tungod kay duna kuno siya’y tulo ka anak nga iyang gibuhi.
Nagdawat siya og 200 U.S. dollar kada bulan, nga kon imong ikambiyo sa atong peso, anaa sa P10,000. Gawas niini, nagdawat siya og 200 Canadian dollar nga kon imong i-convert sa atong kwarta, P8,000 kada bulan.
Di, mudo, aduna siyay P18,000 matag bulan nga madawat pero, nagbagolbol kay kuno gitaktak siya sa listahan nga wala makadawat sa ayuda gikan sa atong gobyerno.
Mao kini ang pinakamaut og batasan sa Pilipino, hinuon dili man tanan, apan kasagaran anaa ang pagkamapahimuslanon sa higayon duna siyay trabaho, P18,000 ang hinabang gikan sa iyang mga paryente sa gawas, apan dili pagyud kontento gusto pan’g mangayo og ayuda sa gobyerno; samtang aduna pa’y daghan kaayong mga walang wala, nga hangtud karon wala paggyud intawon makadawat og hinabang kay kanunay lang laktawan, kay dili man gyud kalikayan nga aduna’y palakasan sa nag-implementar ninii.
Kon ang nagdawat og 4Ps ug ang midawat og social pension, dili apil sa SAP, unsa pa kaha kon nagdawat ka’g dolyar gikan sa imong mga kadugo sa abroad?
Nagpasalamat kita nga adunay DIGONG 8888 nga pwedeng kasumbongan direktamente sa Malakanyang aron madesiplina dili lang ang taga DSWD ug mga barangay kapitanes, kon dili lakip na ang mga residente nga gustong magpahimulos sa higayon, kon diin, sa atong panglantaw mas gustong pang magpadayon ang pandemic aron padayon nga magsalig sa atong gobyerno.
Hinayhinay nang mibalik ang mga dagkong kompanya nga nagsira pagsugod sa Covid-19 sa atong nasud, kon nakatrabaho nata, ayaw na pagsige og hangad sa atong gobyerno kay hilabihan na pagkahagba sa atong ekonomiya.
Human nata gitabangan sa atong gobyerno, karon nga hinayhinay na kitang nahibalik sa normal kita na usab ang mutabang sa nahagba tan’g ekonomiya tungod niining virus nga misanap sa tibuok kalibutan.