UGMANG adlawa, mapupos na ang lugway nga Hunyo 30 sa general community quarantine (GCQ) sa Davao City. Ang pangutana karon, andam na ba nga mosuong ang siyudad sa Modified-GCQ?
Ang mayor ning dakbayan, Mayor Sara Duterte-Carpio, daan nang nagbutyag nga kon mag-MGCQ na ang siyudad, susama lang gihapon ang mga regulasyon niini sa GCQ, lamang ang madugang mao ang pag-abli sa ubang mga establisyemento.
Kana ra. Walay lain. Kay ang liquor ban, magpadayon, ang curfew gipahugtan pa pag-ayo. Ang Food and Medicine (FM) pass ipatuman gihapon.
Kini ang mahitabo sa MGCQ. Nganong ang kadaghanan sa mga tawo ngari sa Davao City, eksayted sa MGCQ? Kung sumadahon, daw di pa gyud andam ang tanan sa giingong second-wave sa coronavirus disease (Covid-19).
Gani, sa matag adlaw, padayon pa gihapon ang pagsaka sa ihap sa natakbuyan sa Covid, ngari sa Dakbayan sa Davao. Buot pasabot, nia pa gyud sa palibot ang virus.
Kon pasilidad, naa ang Davao, apan di nato hulaton nga magdasok sa pasilidad. Hinuon maningkamot kitang tanan nga atong ma flatten ang curve sa kaso sa Covid, pinaagi sa pagtuman sa gipasunod ug mga manud sa otoridad.
Atngan nalang nato ang anunsyo ni Mayor Inday karong adlawa. Ug angay nato nga sundon gayod ug dawaton kon unsay desisyon sa otoridad.