Pag-umangkon ni Piñol maayo na ang kondisyon

NORTH COTABATO -- Anaa na sa maayong kondisyon ang frontliner nga una nga nagpositibo sa coronavirus disease (Covid 19) sa Siyudad sa Kidapawan.

Giila ang biktima nga si Shane Matthew Piñol, 20, ulitawo ug anak ni kanhi Cotabato Board Member Socrates Piñol.

Una nga gikomperma si Shane sa official Facebook page ni Mindanao Development Authority (MinDA) Secretary Manny Piñol nga nataptan ang nahisgutan sa Covid-19.

Ang biktima usa ka frontliner nga nanguna sa pagkuha sa locally stranded individuals (LSIs) ug overseas Filipino workers (OFWs) nga miuli sa probinsya, pinaagi sa Task Force Sagip Stranded Cotabato.

Natakdan ang ulitawo sa duha ka confirmed positive cases nga LSI nga taga Libungan ug Tulunan, North Cotabato.

Namahayag sab si Secretary Piñol nga wala makauban si Shane sa iyang pamilya gumikan nag-inusara lamang siya nga nagpuyo sa iyang balay duol sa Provincial Capitol sa North Cotabato ug wala makatambong sa selebrasyon sa Fathers’ day.

Ang tanan nga katrabaho ug mga kaila ni Shane nga iyang nakauban ang gipailawom na sa 14-day quarantine ug 24/7 strict monitoring.

Sa kasamtangan, gipahugtan pa ang pagpatuman sa mga health protocols sa tanan nga volunteers susama sa paggamit og tamang pagsuot sa Personal Protective Equipment sa tanan nga musundo sa mga LSI.