Nagpasiugda og sinulog sa Basak San Nicolas ikiha

■ PAGSINULOG SA DAN: Ang pagyukbo sa sayaw nga Sinulog alang sa kapistahan sa duha ka mga patron sa sityo sa Barangay Basak San Nicolas, siyudad sa Sugbo wa untay kasaypanan kon wala pa gipaubos og balik sa enhanced community quarantine (ECQ) ang dakbayan batok sa Covid-19. Unsa kaha ang mamahimo nga sangputanan sa mga nagpasiugda sa kalihokan? (Tampo)
■ PAGSINULOG SA DAN: Ang pagyukbo sa sayaw nga Sinulog alang sa kapistahan sa duha ka mga patron sa sityo sa Barangay Basak San Nicolas, siyudad sa Sugbo wa untay kasaypanan kon wala pa gipaubos og balik sa enhanced community quarantine (ECQ) ang dakbayan batok sa Covid-19. Unsa kaha ang mamahimo nga sangputanan sa mga nagpasiugda sa kalihokan? (Tampo)

GIMANDOAN na ni PBGen. Albert Ignatius Ferro ang Criminal Investigation and Detection Group (CIDG) 7 ug Cebu City Police Office (CCPO) nga imbestigahon ug pasakaan og kaso ang nagpasiugda ug nagpaluyo sa prosisyon ug pagsayaw sa dalan atubangan sa kapilya sa Sityo Alumnos, Barangay Basak San Nicolas, siyudad sa Sugbo.

Ang maong sityo nagsaulog sa kapistahan sa duha ka mga patron nga sila si San Juan Bautista ug Santo Niño.

Matod ni Ferro, iya nang gipatrabaho sa CIDG ang maong insidente ug kon kinsa ang mapamatud-an, mag-atubang og kasong kalapasan sa Akta Republika 11332 may kalambigitan sa paglapas sa Bayanihan Act.

“Those who will be found out violating the Bayanihan Act or RA 11332, will be subject for filing of criminal case while barangay officials involved, may face administrative case to dilg,” matod ni Ferro.

Gibutyag ni Ferro nga nakaabot na sa presidente ang maong hitabo ug wala kini mahimuot sa gipanghimo sa mga residente.

Ang Barangay Basak San Nicolas maoy usa sa 12 ka mga barangay nga dunay labing daghan og mga kaso sa Covid-19 nga gi-monitor sa PRO 7.

Ang laing 11 ka mga barangay naglakip sa Barangay Sambag 2, Kamputhaw, Sambag 1, Mabolo, Guadalupe, Lahug, Duljo Fatima, Tinago, Tisa, Ermita ug Tejero.

Nahukman ni Ferro nga ipaubos na sa lockdown ang nahisgutang mga barangay.

“Tanan man barangay anaa sa ECQ pero ato nang i-lockdown ang top 12 nga barangay. We just focus those 12 barangays. Ato lang i-control nga dili na mo-spread pa ang virus,” dugang sa director.

Gipadayag ni Ferro nga tungod sa mga insidente nga nangahitabo kalabot na sa sige lang gihapon sa pagpanggawas sa mga tawo sa ilang mga panimalay, nanaghan ang mga kaso sa Covid-19.

Gusto ni Ferro nga sundon na ang standard guidelines sa kaulohan nga hugot nga ipatuman gyud kon unsay angayan ug pasakaan og kaso ang makalapas.

“Kini talaga wala nay pabor-pabor ni amo nang i-implement ang standard pareha sa Manila. Kay dili man sila magtinarong parang atik-atik man lang sa ilaha,” dason niini.

Gimandoan na sa heneral ang tanang police station sa pagpatuman sa estrikto nga balaud. Pagtuo ni Ferro nga insakto ang presidente sa iyang giingon nga ang mga taga Cebu mga gahi og ulo.

“The president is really true to his comment nga daghang gahig ulo dinhi sa Cebu ba, daghan og mga badlungon,” dugang niya.

Gihulagway ni Ferro nga ang nahitabo sa Barangay Basak San Nicolas usa ka masulob-on pamalandungon nga ingon niadto ang nahitabo bisan paman nga gikapoy na ang kapulisan sa pagpatuman sa ECQ.

“What happened last evening was a frustrating one,” nagkanayon si Ferro.

Si PCol. Cydric Earl Tamayo, officer in charge sa CCPO, miingon nga gisugdan na ang imbestigasyon sa insidente sa Barangay Basak San Nicolas.

Dugang ni Tamayo nga ila na giandam ang pagpasaka og kaso batok na sa nag-organize sa maong kalihukan nga nailhan na sa kapulisan nga si Nicolas Tabar.

Gawas kang Tabar nga maoy nag-organize, posible usab nga mapasakaan og kaso ang uban pa nga nisalmot sa maong kalihukan.

Ang CCPO mosusi usab kon kinsa kining mga anaa sa hulagway ug matumbok sa mga lomolupyo nga niapil sila sa maong kalihukan, pasakaan sila og apil.

Naa sa dul-an napulo ka mga tawo ang posible nga mag-atubang og kaso.

Samtang si Basak San Nicolas Barangay Captain Norman Navarro niangkon nga iyang gitugtan ang pagprosisyon apan nahibulong kini ug nakurat nga duna diay sayaw usa ka oras ang milabay human sa prosisyon.

Si Navarro mipatawag dayon sa organizer nga si Nicolas Tabar human nga giadto kini sa mga sakop sa CIDG ug Mambaling Police Station.

Tumong ni Navarro sa pagsugot sa nag-organisar nga iyang gitugtan tungod kay para kaniya usa kini ka relihiyuso nga kalihokan.

“Maayo pa lagi nga wala nako tugoti kon ingon ana man diay ang resulta wala nalang nako tugoti,” dugang sa barangay kapitan.

Si Navarro midepensa sa Iyang kaugalingon nga gitugotan niya ang nag-organize apan gikasabutan nila nga mga sakyanan lang nga maoy magdagan ug walay manguban nga mga tawo.

Si Navarro magpaabot sa desisyon sa Inter-Agency Task Force (IATF) kon kini man gali ipatawag.

Samtang niining pagsuwat wala pa siya makadawat og imbitasyon gikan sa IATF.

Ang Barangay Basak San Nicolas duna nay 109 ka mga nagpositibo sa Covid-19 ug unom niini anaa sa Sityo Alumnos diin kasagaran naka-home quarantine. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph