NIPAGWAS sa ilang statement ang Philippine Association of Medical Technologists Inc. (PAMET) Cebu chapter niadtong Hunyo 21, nga mihangyo sa lokal nga pangagamhanan sa mga dakbayan sa Mandaue ug Sugbo nga i-fast track ang sweldo sa mga medtech nga nihatag sa ilang serbisyo atol sa 10-day Strategic Community Testing.
Apan matod ni Atty, Giovanni Tianero, budget officer sa dakbayan sa Mandaue, naproseso na nila tanang kinahanglan nga iproseso.
Ang suweldo sa mga medtech madawat na nila karong semanaha.
Gipasabot sab ni Tianero nga ang maong suweldo sa mga medtech susama sa unang sweldo sa mga nagtrabaho sa gobyerno nga dili madali og kuha.
“I think everybody in the government will know,” sigon ni Tianero.
Gisiguro lang ni Tianero nga makompleto ang accounting requirements ug requirements nga kinahanglan sa Commission on Audit (COA).
Gani sa pakighisgotay ni Tianero sa Mandaue City Health Office niingon kini nga ang mga dokumento napinalisa na sa miaging semana ug ang mga medtech nahibawo na sab sa miaging semana nga madawat na nila ang sweldo karong semanaha.
Adunay mokabat sa 20 ka mga medtech ang gi-hire sa Mandaue alang lang sa pagpahigayon sa strategic community test o rapid testing.
Gisaaran ang mga medtech nga ang honorarium nila tag P1,000 matag adlaw ug ang rapid testing nidagan og 10 ka adlaw ug na-extend og tulo ka adlaw hinungdan nga makadawat ang mga medtech og P13,000. (KFD)