KAPIN sa P5 milyones nga balor sa shabu nasakmit sa mga Drug Enforcement Unit sa Cebu City Police Officer sud sa siyam ka mga oras sa managlahing mga buy-bust.
Pasado alas 10 sa gabii sa Nobiyembre 30, ang grupo ni Police Major Eduard Sanchez, hepe sa Sawang Calero Police Station, nilusad og buy-bust sa Sityo Lawis, Barangay Pasil, Siyudad sa Sugbo.
Mga suspek giila ni Sanchez nga sila si Janero Cabanit, 32, ug Merito Aban, 42, pulos taga Sityo Lawis.
Si Cabanit maoy target sa buy-bust kay gikonsiderar nga city level high value target.
Usa ka tinun-an nga si Ryan Buhian, 23, nasikop usab.
Si Cabanit nakuhaan og P375,000 nga balor sa shabu.
Sa Martes sa buntag, Disyembre 1, nasikop nila ni Police Major Dindo Juanito Alaras, Jr., hepe sa Mabolo Police Station si Ma. Rachel Montero, alyas Iki, taga Barangay Carreta.
Nasakmit gikan kang Montero ang 700 gramos nga shabu balor og P4.8 milyunes.
Nagtuo si Alaras nga dakong drug lord ang tinubdan ni Montero sa shabu.
“Kon imong tan-awon ang putos sa shabu nga among nakuha sa dinakpan susama lang sa mga chinese tea bag tungod kay ininsik ang mga nakasulat didto nga kana bitaw murag tape nga ipilit,” matod ni Alaras.
Si Alaras nagtuo nga duha ka kilo ang gibilin kang Montero, apan nahatod na ang uban tungod kay ang duha ka mga plastik pang usa ka kilo nga putos.
Kapin sa usa ka semana nga gimonitor si Montero hangtud nga naorderan og dako nga balor sa shabu ug napahigayon ang buy bust sa usa ka motel sa Barangay Carreta. (BBT)