COTABATO CITY -- Gitudlo na sa Bangsamoro Autonomous Region in Muslim Mindanao (Barmm) Government si Cotabato 1st District Board Member Mohammad Kelly Antao isip administrador sa 63 barangay sa probinsya sa Cotabato nga nahiapil na sa Special Geographic Area sa rehiyon.
Kini gilangkuban sa 2 barangay sa Aleosan, 7 sa Carmen, 7 sa Kabacan, 13 sa Midsayap, 12 sa Pigcawayan ug 22 sab sa Pikit Cotabato.
Gawas kang Antao, una nga gipilian isip caretaker sila Board Member Dulia Sultan ug Moro Islamic Liberation Front (MILF) Local Monitoring Team Head Habib Guiabar.
Natunga sab sa 8 cluster ang 63 barangay sa North Cotabato ug dunay gitudlo nga mga area coordinator ang Barmm Government.
Napili nga mga area coordinator sila Ibrahim Rahman alang sa Pigcawayan; Duma Mascod ug Mohamad Tayuan alang sa 2 cluster sa Midsayap; Abdulatip Tiago, Jimmy Adil ug Commander Nayang Timang alang sa 3 cluster sa Pikit; MILF Local Monitoring Team Head Habib Guiabar alang sa Kabacan; og Esmael Maguid sa Carmen.
Kahinumdoman, nga mipabor sa Bangsamoro Organic Law og giboto ang yes sa nakalabay nga plebisito ang mga molupyo sa 63 barangay sa North Cotabato.
Mismo nga si Barmm interim Chief Minister Ahod "Murad" Ebrahim ang mipili kang Antao.
Una sab nga gi-indorso si Antao ni former governor Emmylou "Lala" Mendoza nga karon bise-gobernador sa probinsiya sa Cotabato nga maoy mahimong administrador sa 63 Barangay nga sakop na sa Barmm. (Edgar Fuerzas)