BANSALAN, Davao del Sur -- Mitugpa sa bay tambalanan ang usa ka lalaki human nasamdan ang ulo dihang gihapak og botelya sa ilimnong makahubog sa iya mismong katagay niadtong Dominggo, Hunyo 28.
Nahitabo ang insidente sa Nebrada Subdivision, Barangay Poblacion 2, alas 11:40 sa buntag.
Matod ni Major Peter Glenn Ipong, hepe sa Bansalan Municipal Police Station, nga nailhan ang biktima nga si alyas Kim, kinsa katagay sa suspek nga si Gerry Senit Saludo, niadtong higayona.
Gitataw ni Ipong nga nahitabo ang insidente sa balay sa pamilyang Abella sa lugar human nahitabo ang ilang init nga panaglalis human malango sa ilang gitagay.
Sa kapungot sa suspek, gihapak niini sa botelya sa ilimnon ang ulo sa biktima, hinungdan nga mituasik ang daghang dugo.
Hinuon, daling natabang ang biktima padung sa duol nga Viacrusis Medical Hospital apan gibalhin na sa Davao del Sur Provincial Hospital tungod sa dakong samad sa ulo.
Samtang, ang 32 anyos nga minyong suspek nasikop human nakauli na sa iyang pinuy-anan didto sa Barangay Rizal, atol sa hot pursuit operation sa kapolisan.
Sa kasamtangan, gipadlak na sa selda sa kapolisan ang dinakpan aron manubag sa salaod nga nahimo. (Orlando B. Dinoy)