DIGOS CITY -- Kapin 300 ka pamilya ang mihikling gikan sa ilang mga lugar human miawas ang Canos River Dominggo sa gabii, Hunyo 28.
Halos mga residente sa Punta Biao, Barangay Cogon ang nanaka sa ilang mga atop ug didto sila nabuntagan kay mitaas na ang tubig samtang sila naghulat nga ma rescue.
Gilayong nagpataas og alerto ang City Disaster Risk Reduction and Management Center (CDRRMC) human gimando sa amahan ning dakbayan ang pagresponde sa mga dapit diin naipit ang daghang residente sa kalit nga pagtaas sa tubig baha.
Sukad Dominggo sa hapon, mibundak ang kusog nga uwan sa probinsya sa Davao del Sur, diin ang dakbayan ang hilabihang naapektuhan dihang midako ang tubig sa kasapaan ug nadamyos ang pipila ka parte sa dike sa Caños River.
Apektado sa pagbaha ang mga Barangay Ruparan, Igpit, Dawis, Sinawilan, Barangay Zone 1, Punta Biao sa Barangay Cogon, Aplaya ug Kapatagan diin misulod ang taga liog nga tubig baha sa mga kabalayan mao nga nabilar ang katawhan sa pagbantay sa ilang mga propedad ibabaw sa atop, apan ubay-ubay ka mga gamit ang naanod sa baha.
Dugang sa taho nga usa ka hanging bridge nga nag-konekta sa Sitio Riverside padung sa Sitio Sto. Niño sa Barangay Ruparan, ang naputol.
Gibutyag ni CDRRMC Officer-in-charge Samuel Miralles nga anaa sa 235 ka pamilya ang mibakwit padung sa Digos City gymnasium, ug 66 pamilya ang nagpahipi sab sa Digos City Natonal High School Gym.
Sa inisyal nga datos sa CDRRMC, mokabat na sa 301 ka pamilya ang anaa sa mga evacuation center sa dakbayan.
Dugang ni Miralles nga wala'y nasamdan o kinabuhing nakalas sa maong baha diin sagad sa mga naapektuhan ang mga low-lying areas nga dapit sa siyudad.
Makita sa post sa social media sa pamilyang Claom nga sa atop na lang sila natulog human misud ang baha sa ilang balay.
Natanggong sab ang pipila ka motorista sanglit di maagian ang tulay ug highway nga gilunupan sa baha.
Daling gimando ni Mayor Josef Cagas ang paghatag og pasiunang ayuda sa mga bakwit sama sa habol, banig ug uban pa.
Giabisohan sab ni Cagas ang mga nanimuyo daplin sa kasapaan nga mohiklin una samtang nasinati pa ang daot nga panahon.
Sa maong hitabo, nagpaabot og pag-ampo si Davao City Mayor Sara Duterte-Carpio alang sa mga naapektuhan sa baha sa Davao del Sur.
"Our thoughts and prayers to the people of Digos City who were affected of the Sunday night flood," pamahayag ni Duterte-Carpio kagahapon, Hunyo 29.
Subay sa taho sa Philippine Atmospheric, Geophysical and Astronomical Services Administration (Pagasa), nakaapekto ang localized thunderstorms sa pipila ka parte sa Davao region, hinungdan sa mga pag-uwan nga nagsugod pa niadtong adlaw'ng Sabado.