PADADA, Davao del Sur -- Mag-atubang sa kasong paglapas sa Presidential Decree (PD) 449, kun illegal cockfighting, ang usa ka drayber human nasikop atol sa pag-responde sa kapolisan sa nadawat nga impormasyon labot sa ilegal nga pasabong.
Nahitabo ang insidente didto sa Purok Meteor Garden, Barangay Upper Limonzo ning lugar, alas 2 sa hapon niadtong Dominggo, Hunyo 28.
Si Captain Arnold Absin, hepe sa Padada Municipal Police Station, nag-ila sa suspek nga mao si Sony Albores Sordilla, 43, minyo nga residente sa Purok 3, Barangay New Sibonga, silingang lungsod sa Kiblawan, Davao del Sur.
Abtik nga miresponde ang kapolisan sa gisumbong kanila nga sabong apan paspas sab nga nakadagan ang ubang sugarol nga mitambong sa lugar.
Apan, ang dinakpan maoy naabtan sa mga otoridad, hinungdan nga wa na kini makalusot atol sa beripikasyon.
Nakuha sa posisyon sa suspek ang duha ka manok panabong, bulang ug ubang himan sa sugal.
Sa kasamtangan, anaa na sa kustudiya sa kapolisan ang dinakpan human pasakaan sa maong kaso. (Orlando B. Dinoy)