NAKALITAN gyud ko sa balita sa kalit nga kamatayon tungod sa Covid-19 ni kanhi kongresista ug Konsehal Tony Cuenco. Di gyud kakumpyansahan kining maong sakit nga nakaapekto karon sa tibuok kalibotan.
Condolence alang sa pamilya ni Kong. Tony ug sa tanang mga Sugboanon.
Makahinumdom ko nga dunay mga panahon kadtong batan-on pa ko nga dad-on ko sa akong amahan nga editor sa Cebu Daily Times kon mang-interbyu sila kaniadto kang Sir Tony.
Wa sab ko makalimot nga usa ka higayon kaniadtong kolumnista na ko sa Superbalita nga naimbitar sa usa ka briefing didto sa kaulohan kabahin sa West Philippine Sea.
Isip deputy speaker, nakita nako nga suweto si Sir Tony kabahin sa relasyon sa Pilipinas ug Tsina kaniadto pang panahon ni kanhi presidente Gloria Macapagal-Arroyo.
Dili lang mga hisgutanan labot sa iyang distrito ug sa Sugbo ang iyang gilantaw, apil ang kaayuhan sa tibuok nasud.
COVID
Tungod sa pulitika, naay maghisgot sama nga daghan ra ang bakanteng mga katre alang sa Covid patients sa Sugbo.
Ambot lang niining maong mga online trolls kon si kinsa ang ilang giilad. Ang mga Sugboanon nakahibawo, ug nakita na kini sa team nilang Secretary Roy Cimatu, nga taas kaayo ang waitlist sa atong mga ospital.
Sayang kaayo ang atong pag-estar sa balay kay panahon unta kining quarantine nga mahatagan ang atong health system og lugway nga makaginhawa. Nagsigi na man lang pagsaka ang kadaghanon sa mga positive.
Nalipay na unta ko nga nianunsyo si Mayor Edgar Labella nga wala nay politika sa distribution sa laing batch sa ayudang bugas. Apan, nganong ang MILO man ang makadawat sa bugas diha sa barangay? Mabunggo man gihapon kay dali ra mang mogawas sa social media.
Wa sab ko makasabot nganong limitado ang mga quarantine pass nga giingon ni Mayor Labella nga usa kada household.
Sa pag-distribute na, dunay usa ray madawat ang pipila ka mga household. Di ba formula na nga magtinakdanay hinuon?
Nahadlok ko nga tungod niining maong palpak sa team ni Mayor Labella, madugay pa ang hard lockdown sa Syudad sa Sugbo.
PETISYON
Matod ni Presidential Spokesman Harry Roque, duna pay pagsalig si Presidente Rodrigo Duterte kang Presidential Assistant Mike Dino bisan pa man sa online petition nga niabot na og 4,400 kapin ka mga pirma.
Naghulat si Presidente nga mas modaghan pa ang namirma? Kini ra bang harassment sa RACU 7 mura man hinuon og nagbubo sila og gasolina.
@anol_cebu sa Twitter