PASPAS. Ugma unang adlaw na sa buwan sa Hulyo. Kusog ang dagan sa panahon basta ato lang nga ibaliwa. Motapos ang gibalik nga enhanced community quarantine (ECQ) sa dakbayan sa Sugbo karong adlawa. Apan daghan ang nagduda nga ipadayon gihapon ang ECQ sa sunod buwan tungod sa nagsaka nga numero sa kaso sa Covid-19 dinhi sa dakbayan sa Sugbo.
Gipadala ni Presidente Duterte si Environment Sec. Roy Cimatu aron mohimo og mga lakang sama sa estrikto nga pagpatuman ang kwarentinas tungod kay nakita sa Presidente nga bisan gibalik sa ECQ ang dakbayan sa Sugbo, nagsaka lang gihapon ang kaso sa Covid-19. Kay matud pa ni Presidente Duterte mga gahig ulo ang taga dakbayan.
Mao ni ang 12 ka barangay nga gitumbok sa IATF nga hataas ang mga kaso sa coronavirus: Sambag Dos; Kamputhaw; Sambag Uno; Basak-San Nicolas; Mabolo; Guadalupe; Lahug; Duljo; Tinago; Tisa; Ermita; ug Tejero, nga naa ubos sa hard lockdown.
Nakita gyud ang pruyba sa kagahi’g ulo sa taga Sugbo kay niadtong Sabado nagfiesta sa Sitio Alumnos, Brgy. Basak-San Nicolas. Duna pay Sinulog street dancing. Niadtong Sabado usab 53 ka sugarol nga nagtigbakay nadakpan didto Sitio EZ, Barangay Kal-anan, Tabogon, Cebu. Morag moulbo ang kaspa ni Gob. Gwen Garcia ani nga balita.
Ipadayon man o dili ang ECQ sa dakbayan sa Sugbo sa Hulyo, angay nga ang mga taga dakbayan motuman na sa DOH protocol nga magpuyo sa balay gawas kon mopalit og pagkaon ug medisina, maglikay sa pundok-pundok sa tawo, magsul-ob og maskara ug magsige og panghugas sa kamot gamit ang sabon o di ba alcohol.
Ang usa sa mga rason ngano midaghan ang kaso sa Covid-19 dinhi sa dakbayan tungod kay haguka ang pag-implementar sa kwarentinas. Panahon na nga mopasar ang Cebu City Council og ordinansa nga magmulta o magpriso sa tawo nga mogawas sa ilang balay nga dili mosul-ob og face mask. Ingon man ordinansa batok sa mangluwa bisan asa labina sa mga publiko nga dapit.
Midaghan ang mga tawo nga magsige og gawas sa ilang balay ug molakaw bisan dili importante ang tuyo dihang na GCQ na ang dakbayan. Gani, nakita ni Presidente Duterte nga midaghan ang nanggawas ug nagsuroy-suroy sakay sa mga motorsiklo ug bisekleta.
Si Cebu City Mayor Edgar Labella gusto na nga mabalik sa GCQ ang dakbayan tungod kay daghan na ang way trabaho kay di pa man makapangabli ang non-essential nga mga negusyo. Sa karon, ang abli ra mga tindahan, merkado, gasoline stations ug supermarkets.
Nahimong isyu og balik ang rasyon sa pagkaon sa mga gi-lockdown nga barangay ug ang bag-ong quarantine pass nga ihatag matag balay. Mireklamo ang uban barangay captain nga kuwang ang gihatag nga pass sa ilang dapit. Aw, pasa-pasa lang, Kap, sa silingan kada adlaw aron gamay ra ang makagawas.