HUGTANONG gipanghimakak ni re-electionist Provincial Board member Wenceslao Gakit, 6th District nga nibiya siya sa partido ni Kongresista Nerrisa Soon-Ruiz nga mao ang Nagkahiusang Mandaue hanon.
Usa ka kasaligan nga tinubdan nibulgar nga wa siyay tambong-tambong sa campaign sorties sa partido apan makita sa mga kalihokan ni Mandaue City Mayor Jonas Cortes.
Gitataw ni Gakit nga di siya mosipyat sa pagtambong og pagpangampanya sa higayon nga masayod siya sa mga schedule niini. Nahitabo nga wa siya masayod.
Sumala ni Gakit nga niadtong Marso 26 nga maoy sugod sa pagpangampanya iyang gisugo ang iyang staff sa pagkig-coordinate sa district office ni congressional candidate Luigi Quisumbing alang sa mga schedule.
Pulong pa sa opisyal ang Marso 27 ra nga schedule ang iyang nasayran nga mao ang launching sa district office ni Quisumbing. Apan ang chief of staff ni Ruiz nga si Atty. Gonzalo Malig-on sa iyang text message miingon nga wa motambong sa mga kampaniya matag gabii si Gakit. (FVQ)