GIHATAGAN og 48 oras sa Department of the Interior and Local Government (DILG) ang barangay kapitan sa Basak San Nicolas, Cebu City para sa pagtubag sa show cause order labot sa gipahigayon nga prosisyon ug Sinulog dance isip tipik sa kapistahan sa sityo Alumnos.
Si Atty. Ian Kenneth Lucero, pangulo sa DILG-Cebu City, nitunol na sa Lunes, Hunyo 29, 2020 sa buntag sa show cause order ngadto kang Kapitan Norman Navarro.
Iyang kauban sa pagtunol silang Regional Director Leocadio Trovela ug DILG Assistant Secretary Alexander Macario.
“The directive from RD Trovela was to issue a show cause order para ma-explain ni Kap Navarro ang iyang side and he was given 48 hours from receipt. And his reply will be submitted in our office regarding sa nahitabong procession and Sinulog dance last June 27,” padayag ni Lucero.
Ang pangulo sa DILG Cebu City nipasabot nga si Navarro ang ilang gipadad-an sanglit siya ang pangulo sa barangay samtang ang Criminal Investigation and Detection Group (DILG) nisusi sa laing mga organizer.
“Siya lang ang atong gi- show cause isip amahan sa barangay. D apat nakahibawo siya unsay mga panghitabo diha sa iyang area hilabi na nga karon anaa ta sa state public health emergency,” pasabot ni Lucero.
“We have to abide the directives, policies nga gihimo sa national IATF ug ang tanang balaod related sa pandemic nga kinahanglan i-enforce and strictly comply with the provisions sa omnibus guidelines in the implementation of the community quarantine in the Philippines and to the national law under RA 11332,” dugang ni Lucero.
Si Mayor Edgardo Labella nitahas usab sa pangulo sa City Legal Office pagsusi sa maong insidente.
“Much that I don’t want to offend the religious sensibilities of the faithful, we have an existing prohibition from the IATF to prohibit mass gathering and strict observance of social and physical distancing. I am directing City Attorney Rey Gealon to conduct an investigation on this matter,” butyag ni Labella.
Si Gealon nipada na usab og show cause order ngadto kang Navarro para matubag ang maong hitabo.
“It is apparent from the occurrence that the barangay has been too complacent in implementing the clear mandate of the law and has been negligent in its duty to enforce the executive order (ni Mayor Edgardo Labella),” tipik sa show cause order sa City Legal Office.
Ang pagpahigayon og mass gathering wala tugoti sa gobyerno sama sa fiesta ilawom sa guidelines sa IATF panahon sa ECQ.
WA MOTUMAN
Nasagmuyo si Basak San Nicolas Barangay Captain Norman Navarro nga apil siya sa 13 nga pasakaan og kaso nga kriminal sa Cebu City Police Office (CCPO)
Kasong paglapas sa Executive Order (EO) 82 ni Labella nga nagbutang sa Dakbayan sa Sugbo sa enhanced community quarantine (ECQ) ug kalapasan sa Republic Act
(RA 11332) nga naila nga Mandatory Reporting of Notifiable Diseases and Health Events of Public Health Concern Act ang gipasaka.
Giangkon ni Navarro nga isip amahan sa barangay, nagbuhat lang siya unsay angay nga buhaton.
Siya niangkon nga iyang gitugtan ang mga organizer sa pagpahigayon og prosisyon, apan kinahanglan nga mosubay sa mga health protocol.
“Siyempre na disappointed ko. Nagtrabaho baya ta. Usa ray sala ra gyud adto. Kadto ra gyud mitando ko nga magprosisyon sila. Tungod kay para kanako walay sayop ato kay relihiyoso man nga kalihukan,” nagkanayon si Navarro sa interview sa Superbalita Cebu.
Matod ni Navarro nga ang bugtong ebidensiya lang niini mao ang ilang komunikasyon sa organizer sa text messaging nga iyang gitugtan, apan kinahanglan isakay ang imahen sa santos og sakyanan ug way gitugtang mokuyog.
“Naa mi komunikasyon sa organizer kay mi text siya nako ug mihangyo nga magpahigayon sila og misa sa kapiyestahan sa maong sityo apan wala ko mosugot,” matod ni Navarro.
Bisan gani ang pari nihangyo kaniya, iyang gibalibaran kay aron malikayan nga malapas ang social distancing.
Ang organizer nga si Nicolas Tabar ni-text pag usab kang Navarro aron sa paghangyo nga kon mahimo, katapusang hangyo na lang, nga magprosisyon sila hinungdan nga mitugot siya.
Giangkon ni Navarro nga nipadala siya og iyang mga tanod aron mapatuman ang social distancing ug makontrolar ang mga tawo nga magpaabot sa santos nga molabay.
Apan natinga na lang si Navarro nga ang nag organize sa kasaulogan wa mopahibawo nga duna diay silay laing kalihukan nga mao ang pagsayaw sa mga dancer atubangan sa simbahan nga maoy wala maapil sa ilang kasabutan.
Si Navarro mokiha sa mga organizer.
“Ako ni silang file-an og kaso na lang tungod niadtong hitaboa. Dako ni sila og danyos nga nahatag sa barangay,” nagkanayon si Navarro.
Iyang gihulagway ang hitabo nga dakong pagsuway sa iyang gimbuhaton.
Sa iyang opisyal nga pamahayag, si Navarro nipasabot kon unsa ray iyang gitugot.
Walay pagtugot nga mag-motorcade, Sinulog dance presentation ug fireworks. Ang atong gitugot kay mobile karo ra ug walay tawo na mga kuyogUG na ituyok og kadali sa Sitio pareha atong gituyok sa Basilica ang Sto. Niño. Gibalibaran sad nato ang pagmisa. Mobile ra ilang panaghid sa pagtuyok sa Santo sigon sa organizer sa Sitio Alumnos. Wala sila’y written permit ani tanan,” matod ni Navarro
Awhag ni Navarro sa mga Basakanon nga motuman sa lagda nga gipatuman sa kagamhanan tungod ning krisis nga natagamtaman sa kasamtangan.
Apan alang kang Police Regional Office (PRO) 7 chief Brigadier General Albert Ignatius Ferro nga wa maka supervise si Navarro sa dihang gipahigayon ang prosesyon.
Nasagmuyo si Ferro sa hitabo taliwa sa ilang paningkamot nga di na mokatap pa ang Covid, dunay mga barangay official nga napakyas pagbuhat sa gimbuhaton. (PAC, BBT, AYB)