DAKO karon ang pagtuo ni Konsehal Janvi Del Serna sa dakbayan sa Lapu-Lapu nga sa isolation center sa dakbayan niya posibleng nakuha ang kagaw sa coronavirus disease 2019 (Covid-19) nga mitakboy kaniya.
Kini human nga nibisita siya sa pasilidad atong miaging semana kay aduna siyay gihatod nga mga pasyente nga asymptomatic.
Giingong nagpatabang kaniya ang mga pasyente sanglit wala makatultol sa pasilidad.
Si Dela Serna maoy ikaduhang konsehal sa dakbayan nga nataptan sa Covid-19 . Una sni Konsehal Rico Amores.
Si Lapu-Lapu City Mayor Junard Chan nataptan usab sa Covid-19 apan hingpit nang nakarekober ug nibalik sa iyang naandang gimbuhaton.
Gibutyag ni Dela Serna nga asymptomatic usab siya kun walay gipamati sa pagkakaron.
Nag-isolate na usab siya sa iyang panimalay aron kalikayan nga makatakod sa uban niyang kabanay.
Sumala pa sa konsehal naglain ang iyang lawas niadtong Hunyo 24 ug gihilantan hinungdan nga nakahunahuna nga magpa swab test sa City Health Department aron makasiguro.
Biyernes, Hunyo 26, nawagtang ang iyang hilanat apan nianang Dominggo Hunyo 28 nadawat ang kompirmasyon nga siya nagpositibo sa Covid-19. (GCM)