BISAN sa pag-umol og team sa mga pulis nga mogukod sa mga sakop sa mga gang nga nalambigit sa krimen, wa gihapoy puas ang gubat sa duha ka managkaribal nga mga gang sa dakbayan sa Sugbo.
Gani, ang gubat sa Crips ug Bloods nikalas na sab og laing kinabuhi kagahapon sa kaadlawon dihang ang duha ka mga grupo nagkaengkuwentro.
Nahitabo ang pinusilay sa mga sakop sa duha ka mga gang pasado ala una sa kaadlawon sa dan J. Luna st., Barangay Mabolo, North Reclamation Area, duol sa Pier 6.
Ang biktima nga namatay human maigo sa dughan giila nga si Jordan Rosales, 18, gituohang sakop sa Crips gang.
Sa pasiuna nga imbestigasyon nga gihimo nila ni PO3 Geofrey Gutual sa Homicide Section nagbutyag nga nagtapok ang biktima uban sa iyang mga higala.
Ang ilang grupo nag-inom sa maong dapit.
Sa kalit lang, nangabot ang laing pundok sa mga batan-on nga gituohang mga sakop sa Bloods gang hinungdan nga nahitabo ang pinusilay sa duha ka mga grupo.
Nakadawat sa maong alarma ang kapolisan sa Mabolo.
Sa ilang pag-abot sa dapit nanagan ang mga batan-on nga nakadungog sa siren.
Ilang nakaplagan si Rosales nga nagkulob sa daplin sa dalan ug dunay samad pinusilan.
Nakuha gikan kang Rosales ang usa ka cal. 357 magnum revolver uban sa lima ka mga kabhang sa bala ug usa ka bala.
Si Rosales daling gidala sa Cebu City Medical Center (CCMC) tungod sa samad sa dughan.
Apan wa magdugay nakabsan kini sa iyang kinabuhi.
Nihimo pa og follow-up ang kapulisan aron pag-ila sa mga mamumuno samtang gisuwat kining taho.
Si Cebu City Police Office Director Patrocinio Comendador Jr. ni-reactivate sa Anti-Street Hoodlum Team sa miaging semana.
Ang team gipangulohan ni Senior Insp. Bonifacio Garcia kinsa gitahasan sa paggukod sa gang members nga nalambigit sa mga krimen.
Ang mga barangay Mabolo, Carreta, Sambag, Guadalupe, Pardo, ug Labangon maoy giilang mga dapit nga naa ang mao ang mga gang.
Sa sayo pa sab, si Arsobispo Ricardo Cardinal Vidal niawhag sa mga batan-on sa paglikay sa mga kasamok nga may kalambigitan sa mga gang.