ALARMING ang coronavirus infections sa Dakbayan sa Sugbo.
Mao kini ang paghulagway ni Department of Environment and Natural Resources (DENR) Secretary Roy Cimatu, pangu sa Covid-19 response sa Sugbo, atol sa nasudnong press conference sa Martes, Hunyo 30, 2020.
Tungod niini, irekomendar niya kang Presidente Rodrigo Duterte nga ipailawom gihapon ang Cebu City ubos sa enhanced community quarantine (ECQ) sugod sa Hulyo 1.
Si Cimatu gipadala ni Duterte sa Dakbayan sa Sugbo aron modumala sa Covid response sa Malacañang human mabantayi ang padayong pagsaka sa mga kaso sa Covid-19 bisan ubos kini sa ECQ sukad niadtong Hunyo 16, 2020.
Duha ka mga rason ang gitumbok ni Cimatu nganong “alarming” ang mga kaso sa Covid-19 sa Cebu City.
Una, taas kaayo ang porsyento sa mga nagpositibo sa swabbing, mas taas kon itandi sa nasudnong gidaghanon.
Sa national swab testing result, sa matag 100 kaniadto, dunay 18 nga magpositibo, pasabot ni Cimatu. Sa pagkakaron, naa na lang kini ubos 10 kun ubos sa 10 porsyento.
Apan lahi ang iyang nakita sa Dakbayan sa Sugbo kay sa 100, dunay 30 nga positibo sa Covid-19 kun 30 porsyento sa mga tawo nga gi-swab test.
“Out of 100, 30 yung positive. Matataas ang positivity. Nagtataka ako kung anong deperensya ito. Kung bakit ang laki-laki naman ng percentage,” matod ni Cimatu.
Nag-una sa iyang nakitang hinungdan mao ang wa pagpatuman sa social distancing sa mga barangay.
Ikaduha, iyang nabantayan nga dunay barangay isolation centers nga nahimutang sa tunga-tunga sa barangay. Iyang tinguha nga mabalhin kini sa layo sa sentro sa populasyon.
“Merong barangays dito na yung isolation center nila right in the center of the barangay. Ilayo ko ito from the center of the city,” dugang ni Cimatu.
Mga tunghaan ang gipanggamit karon nga barangay isolation centers (BIC). Gipamutang niini mao ang mga positibo sa Covid-19 nga asymptomatic kun way mga simtomas nga gipamati.
Ang kadtong dunay mild to moderate og mga simtomas naa sa tulo ka quarantine centers nga giandam sa Siyudad sa Sugbo ug pribadong sector.
DAGHAN NAMATAY
Laing nakapaalarma kang Cimatu mao ang gidaghanon sa nangamatay matag adlaw.
Matod niya nga niadtong Lunes, 13 ang nangamatay nga alang kaniya, taas ra kaayo kon usa lang ka siyudad ang hisgutan.
Siya niingon nga di hinuon kini average sa gidaghanon sa nangamatay matag adlaw, apan mao kadto ang usa sa labing taas.
“If you have a city na 13 yung namatay ay mabigat na ito. Hopefully ma-arrest,” matod ni Cimatu.
3-DIGIT NA SAB
Sa Hunyo 29 nga datus nga gipagawas sa Cebu City Health Department, dunay 191 ka bag-ong mga kaso sa Covid-19. Hinuon, duna say 114 ka recoveries kun nangaayo.
Sa Martes, Hunyo 30 nga datus, dunay 353 ka bag-ong mga kaso sa Covid-19, 10 ang recoveries kun nangaulian ug way nangamatay. Karong buwana mao kini ang labing taas.
Ang labing daghan og bag-ong mga kaso sa Hunyo 30, mao ang Barangay Guadalupe nga dunay 44.
Ikaduha mao ang Barangay Sambag 2, nga dunay 27 ka bag-ong mga kaso.
Kining duha ka mga barangay nalakip sa 12 ka mga dapit sa Dakbayan sa Sugbo nga gipaubos sa granular lockdown.
Laing mga barangay nga gipaubos sa samang lockdown mao ang Sambag 1, Kamputhaw, Basak San Nicolas, Lahug, Duljo Fatima, Tinago, Tisa, Ermita, Tejero ug Mabolo.
Mga permanente nga police checkpoint ang gipangmontar sa strateging mga dapit sa Dakbayan, labina ning mga barangay nga ubos sa mas higpit nga lockdown.
Sa miaging semana, ang Camp Crame nipadala og 150 ka mga sakop sa Special Action Force (SAF) sa Dakbayan sa Sugbo aron idugang sa mga pulis.
Laing mga police unit nga gipadala nagagikan sa Police Regional Office (PRO) 8, Bohol ug Siquijor.