BARANGAY konsehal napriso uban sa iyang asawa ug duha ka mga anak human gikulata nila iyang mga ginikanan ug pag-umangkon niadtong Dominggo sa alas 9:30 sa buntag, Hunyo 28, sa Purok Nangka Brgy. Panadtaran, lungsod sa San Fernando.
Si Konsehal Emeliano Saguisabal, 40, minyo, gitanggong karon sa San Fernando Police Station, uban sa iyang asawa nga si Beverlita, 48, mga anak nga sila si Jonphor, 25, ug Emervie 21, dalaga.
Samtang nasamad ang ulo sa iyang amahan nga si Gilomeno Saguisabal, 71, inahan nga si Florencia, 70, ug apo nga si Cassey Mae Cantina, 26, dalaga.
Si SPO2 Marvin Ando, imbestigador sa San Fernando Police Station nga nahinabi sa Superbalita Cebu, nagkanayon nga dugay na nga nagkabangi ang maong pamilya.
Personal, lakip sa isyu nila sa kabtangan ug yuta, ang gikabangian.
Makadaghan na sab sila mag-atubang sa barangay hall ingon man nagpa-blotter sa police station.
Nabulabog sayo sa buntag niadtong Dominggo ang maong dapit dihang sila si Emeliano ug Gilomeno nagkombate.
Si Gilomeno nibutyag nga nagtakin siyag sundang sa iyang hawak kay padulong siya nga manuba sa ilang tanom nga saging.
Gisugat siya ni Emeliano, gisukmatan kabahin sa iyang multicab nga nayab-an og pintal.
Nagkainitay ang ilang panaglalis, si Emeliano nikuhag metal frame sa ilang bintana, gibunal ngadto sa ulo sa iyang amahan.
Tungod niini, nagkalamoklamok ang mga sakop sa pamilyang Saguisabal.
Si Emeliano giingong nikulata sa iyang amahan aron mailog ang sundang. Giingong si Jonphor nitabang usab pag-ilog sa sundang.
Ang apuhang babaye nga nakakita sa iyang bana, dali nga mitabang, iyang gibunalag sungkod sila si Emeliano ug Jonphor.
Si Jonphor nibunlot sa sungkod, giduslak ang tiyan ni Florencia, samtang si Emeliano nikuhag sobra sa tiles, gibunal sa ulo sa iyang inahan.
Si Cassey Mae nga nakakita sa iyang mga apohan nga nagkadugo ang mga ulo motabang unta, apan gisugat siya sa iyang ig-agaw nga si Emervie, sila ang nagbugno.
Sa ilang panagbugno, si Berlita, iyang inahan, nitabang sab sa binugnuoay.
Si Emeliano nga nakakita sa panagbugno sa iyang asawa, anak batok sa pag-umangkong babaye, niduol, gisukmag si Cassey Mae sa tiyan, hinungdan nga nakuyapan.
Ang ilang mga paryente daling ni-report sa kapulisan, gipangdakop sila si Emeliano, Berlita, Emervie ug Jonphor.
"Kato ra gyud nakaingon ang pintal, nayab-an ang ligid sa multicab sa konsehal nga gikasakit daw niini," dugang ni Ando.
Apan gawas sa maong isyu, duna na silay karaang gikabangian. Bag-uhay lang silang nag-atubang sa barangay hall.
Kasamtangan karong gitanggong ang konsehal uban sa iyang asawa ug mga anak samtang gihikay pa ang kasong physical injuries. (GPL)