ATO sa ipadaplin ang paghisgut sa nahitabo labot sa Covid-19 tungod kay akong ipadayag ang kalipay nga gipirmahan na ni President Rodrigo Duterte niadtong niaging Huwebes sa balaod nga nagmando nga itudlo ang Good Manners and Right Conduct (GMRC) ug Values Education itudlo gikan sa kindergarten ngadto sa senior high school sa tibuok nasud.
Ang pangulo nipirma sa Republic Act 11476, kun GMRC ug Values Education Act, nga nag-institusyonalisa sa komprehensibo nga GMRC ug Values Education program sa K-12 curriculum.
Alang sa atong kasayuran sa maong balaod, ang GMRC itudlo gikan Grade 1 ngadto Grade 6 isip buwag nga subject nga sama ubang subjects ug iapil sa inadlaw nga aktibidad sa kindergarten level.
Sa Grade 7 ngadto Grade 10, ang Values Education itudlo nga dunay susama nga igahin nga oras sa uban nga core subjects. Ilakip usab kini sa pagtudlo sa mga subjects sa Grade 11 ug Grade 12.
Ang GMRC giwagtang isip regular subject dihang gipatuman ang K-12 Pogram pito na ka tuig ang milabay.
Nalipay ako tungod kay sa sayong yugto sa kinabuhi sa mga bata mahibalo na silang daan sa maayong pamatasan.
Kon hingpit na nga mapatuman ang Republic Act 11476 kun Good Manners and Right Conduct (GMRC) and Values Education Act labing seguro nga magtubo ang mga bata nga matinahuron ug matinumanon sa balaod.
Apan kadiyot lang, bisan pa man nga dunay balaod nga itudlo na ang GMRC sa mga estudyante, apan kinahanglan gyud nga di sila maimpluwensyahan sa pamilya ug sa mga tawo nga naa sa ilang palibot.
Daghan man gud akong namatikdan sa palibot, ilabi na miyembro sa pamilya, nga mao pay motudlo og di maayong pamatasan sa ilang kabataan.
Gawas sa miyembro sa pamilya, duna say mga lider sa barangay, munisipyo, siyudad, probinsya, o nasud nga di maayo ang batasan ug ngil-ad ang mga pulong nga gipakita sa mga nag-idolo nilang kabataan.
Kini nga mga kinaiya, suma pa sa akong paryente nga nagpuyo sa Japan, di nila makita sa ilang mga lider ilabi na sa ilang mga silingan.
Mao man bitaw nga kung itegridad ang atong hisgutan, layo ra kaayo kita kung ikompara kanila kay didto ilang nasud, kung ang opisyal sa gobyerno nakasala, mapagkapamatay kini tungod sa kaulaw, apan diri sa ato makigpatay pa sa mga tawo nga nagpakaulaw kanila.
Hinaut nga magsugod ang GMRC sa atong pamilya ug di lang kini tukob sa classroom kundi maaplikar kini sa tinuod nga kinabuhi sa umaabot nga mga henerasyon.