NAHIMONG init nga hisgutan sa social media ang nahitabo ni Frankie Pangilinan, anak ni Senador Francis Pangilinan ug inilang aktres nga si Sharon Cuneta, nga nakadawat og rape threat gikan sa usa ka netizen.
Si Frankie nahimong biktima sa pagpanghulga human nanawagan kini nga hunungon na ang way hinungdan nga pagbasol sa mga biktima sa pagpanglungos o victim-blaming.
Sa pagsulat ining maong lindog, gisugdan na sa National Bureau of Investigation (NBI) ang imbestigasyon kabahin sa hitabo ingon man sa pag-ila sa suspetsado.
Dili lang si Frankie maoy biktima sa libuan ka mga kaso sa gender-based violence (GBV). Bisan pa man nga wala pa nahitabo ang pandemiya, ang mga babaye nag-atubang og diskriminasyon ug pagpanghimulos.
Sukad niadtong Hunyo 11, natala sa Philippine National Police (PNP) ang 2,183 ka kaso sa pagpangabuso sa kababayen-an ug laing 2,077 ka kaso sa pagpangabuso sa mga bata sukad gipatuman ang kwarantina niadtong Marso.
Kasagaran sa mga nasikop sa kapolisan nga mga suspetsado sa mga krimen mao ang mga paryente mismo sa mga biktima nga nagpahimulos sa mga bata sulod sa panimalay.
Matod pa sa Philippine Commission on Women (PCW), ang mga kaso sa pagpangabuso nakalapas sa Anti-Rape Law, Anti-Violence Against Women and their Children Act, Articles No. 334 (Concubinage) ug 336 (Acts of Lasciviousness) sa Revised Penal Code, Anti-Photo and Video Voyeurism Act, Anti-Trafficking in Persons Act, Anti-Sexual Harassment Act, ug Safe Spaces Act.
Dili lang ang mga ahensya sa gobyerno ang nagsubay sa maong mga insidente. Nagkadaghan sab ang mga reports nga non-government organizations (NGOs) kabahin sa mga insidente sa harassment ug sex trafficking sa social media.
Gikabalak-an sa Girls Advocacy Alliance (GAA), usa ka pundok sa mga NGOs lakip na ang Children’s Legal Bureau (CLB), ang mga kaso sa violence against women and children (VAWC) tungod sa kwarantina. Dunay dakong posibilidad nga kulang ang datos sa mga reports ug duna pay daghang biktima sa pagpangabuso samtang nakigbatok kita sa Covid-19.
Dunay pipila ka hinungdan kon ngano lisod ang pagsumbong sa mga kaso sa pagpangabuso. Aag kahadlok sa biktima nga mosumbong, pagpakauwaw sa mga biktima, huyang nga pagpatuman sa balaod, limitado nga support services, ug uban pang limitasyon dala sa pagpatuman sa kwarantina.
Tungod kay dakong epekto sa panginabuhian ug ekonomiya ang Covid-19, gipanglantawan nga musaka pa ang sekswal nga pagpanghimulos sulod sa mga panimalay. Ang kakabus maoy ugat kon ngano dunay pagpangabuso sa mga bata sa sex industry.
Nasayod ang Girls Advocacy Alliance nga naninguha ang gobyerno sa pagpanalipod sa mga babaye ug bata karong pandemiya. Apan gihagit sa maong alyansa nga angay lang doblehon sa gobyerno ang pakigbatok sa tanang porma sa pagpangabuso susama sa pagpaninguha ini nga mapugngan ang pagkatag sa Covid-19.
Lakip sa angay nga buhaton sa gobyerno mao ang kanunay nga monitoring sa mga bata ug kababayen-an sa matag kominidad, pagsiguro nga mahimong accessible ug available ang 24/7 reporting hotlines ug uban pang support services sama sa legal ug psychological support, ug saktong pagpatuman sa mga balaod nga nagpanalipod sa mga bata ug kababayen-an.
Gipahinumdoman sa mga mambabalaod ug mga panguo sa ahensya sa gobyerno nga angay pa nga pahugtan ang mga balaod batok sa pagpanglugos ug pagpanubag sa mga akusado sa maong krimen. Usa sa mga epektibong pamaagi aron mamenosan ang kaso sa pagpanglugos mao nga patas-an ang statutory age of rape nga kasamtangang anaa sa dose (12) anyos.
Alang sa mga lokal nga kagamhanan, mahimo sila nga makatabang pinaagi sa mga online ug community-based information campaigns; pagpalig-on sa mga reporting mechanisms, pagmugna og mga resolusyon batok sa gender-based violence, ug pagmugna og child-friendly ug gender-responsive feedback mechanisms.
Ang pribadong sektor sama sa medya, internet service providers, social media and technology companies, travel and tourism industry, ug financial institutions, angay sab nga manubag sa ilang mga responsibilidad sa pakigbatok sa gender-based violence.
Angay lang nga mangilabot ang publiko sa pagtubag sa laing krisis sa mga bata ug kababayen-an ug isumbong dayon ang mga gisuspetsaan nga insidente sa gender-based violence sa inyong komunidad ngadto sa kapolisan, barangay, local social welfare and development office, ug non-government organizations sama sa CLB.
[Mahimo kamo nga mopadangat sa imga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o send og mensahe sa Facebook page nga “Children’s Legal Bureau” m.me/ChildrensLegalBureauInc (Messenger)]