KASO nga kalapasan sa Republic Act 10591 o illegal nga paghupot og armas ang gipasaka nga kaso batok sa usa ka 30 anyos nga lalake nga nipusil patay sa usa ka iro sa Sityo Mahayahay, Barangay Toong, Siyudad sa Sugbo.
Si Police Master Sergeant Edmund Tiempo sa Labangon Police Station, niila sa suspek nga si Renerio Tabay, taga Sityo Mahayahay.
Matod ni Tiempo nga si Tabay napasakaan na og kaso niadtong Hunyo 29, human nila masikop niadtong Dominggo sa hapon.
Kini human girespondehan sa kapulisan ang reklamo sa us aka Ryan (tinuod nga ngan gipugngan tungod sa hangyo) nga gipusil ni Tabay ang usa ka iro.
Dugang pa ni Tiempo nga subay sa pangangkon ni Tabay nga iyang gipusil ang iro human ang mga binuhing manok nga iyang gibantayan nga anaa sulod sa kural gipanggukod. Tungod sa kalagot ni Tabay, iyang gipusil ang iro ug ang iro namatay. Si Tabay naa pa sa Labangon Police Station gibilanggo. (BBT)