GIANDAM na sa Kagamhanan sa Dakbayan sa Lapu-Lapu ang 20,000 ka tabletas sa Vitamin C nga ipang apod-apod ngadto sa mga posibleng naka contact og mga coronavirus disease (Covid-19) patients.
Kini aron molig-on ang ilang immune system ug malikay sa Covid-19, pahibawo ni Mayor Junard Chan sa iyang Facebook page.
Sumala ni Chan nga personal nga kwarta lang una ang iyang gigamit aron dali mapalit ang mga bitamina.
Kini gumikan taas pa ang proseso pagpalit kon gamiton ang pundo sa kagamhanan.
Ang mga kaso sa Covid-19 sa Dakbayan sa Lapu-Lapu kada adlaw nagsaka.
Labing uwahi nga natala mao ang 37 ka mga kaso sa Covid-19 sa Martes , Hunyo 30.
Kini naghatod ngadto sa 604 ka mga kaso sa kinatibuk-an sa Covid-19 sa dakbayan.
Gibutyag sa mayor nga ang tagaan sa mga tabletas sa Vitamin C mao ang mga indibidwal nga adunay close contact o na-exposed sa usa ka Covid patient.
Ang mga naglangkob sa City Health Office maoy magbitbit niining maong mga tabletas atol sa ilang subsob nga contact tracing.
Gipang-apod-apod na usab ang Vitamin C sa mga nagpositibo sa Covid-19 nga naa sa isolation facility sa dakbayan.
“Para ma boost ang ilang immune system ug dili sila dali mataptan sa Covid o bisag unsa pa nga klase sa virus hilabi na karong buwana mao ang season nga ting-flu,” tipik sa post ni Chan. (GCM)