ANG Cebu City Government nipadala na og show cause order ngadto sa barangay kapitan sa Calamba, kansang mga residente nakuhaan og video nga nag-inom ug nag-disco niadtong Dominggo, Hunyo 28.
Nimando si Mayor Edgardo Labella nga paisplikahon si Kapitan Victor Quijano kon nganong nahitabo kadto.
Si Atty. Ian Kenneth Lucero sa Department of the Interior and Local Government (DILG) Cebu City nibutyag usab nga mohimo sila og kaugalingon nga imbestigasyon mga maoy ilang basehan sa pagpasaka og kasong administratiba kon adunay igong basehanan batok kang Quijano.
Ang Calamba maoy ikaduhang barangay nga nipahigayon og mass gathering human sa Barangay Basak San Nicolas.
Si Labella mitahas kang City Attorney Rey Gealon paglusad og imbestigasyon gumikan sa hitabo.
Si Basak San Nicolas Barangay Captain Norman Navarro nanghimakak nga dunay pagtugot kaniya ang prosesyon ug Sinulog dance.
PULIS MOKIHA
Gawas sa posibleng kiha sa Siyudad, niay laing bad news alang niadtong mga namista ug misaulog sa kapistahan sa usa ka sityo sa Barangay Calamba.
Ipangkiha sila sa Police Regional Office (PRO7).
Kini gumikan kay hugtanong gidili ang panagtapok nunot sa pagpa-ubos sa tibuok dakbayan sa enhanced community quarantine (ECQ).
Makita sa kuha sa video nga gi-post sa social media ang nagsadya nga mga batan-on sa usa ka bahin sa dalan A. Lopez, Barangay Calamba nga misaulog sa kapistahan sa ilang patron.
Milusad og imbestigasyon ang kapulisan base sa nag-viral nga video uban sa mga barangay opisyal sadapit aron pag-ila niadtong mga tawo nga nakuyog sa tapok-tapok.
“It will be a direct filing because we cannot arrest them anymore. Hindi man on the act, inflagrante delicto, wala tay basis for a warrantless arrest. So, what we will be doing is just a simple direct filing,” pamahayag ni Police Brigadier General Albert Ferro, direktor sa PRO 7.
Nasagmuyo ang opisyal nga bisan sa paningkamot sa kapulisan nga mabalik na sa normal ang kinabuhi sa mga Sugboanon, apan adunay pipila nga gahi pasabton.
Iyang giangkon nga ang kapulisan sa dakbayan sa Sugbo nga di makaato pagbantay sa mga sudlonon nga bahin sa mga barangay sa ilang pag-roving gumikan sa kadaghan sa mga dapit nga apektado sa virus.
Panawagan ni Ferro sa publiko sa pagkooperar ug di lang bantayan ang pulis aron lang mohimo na usab silag kalapasan sa balaod.
“We cannot succeed if the community is always violating. You always go there and paghawa namo, naa sila i-violate. So, that’s not good, and our policemen could not sleep on the street,” matod ni Ferro. (AYB)