TEMPORARYONG gihunong sa Cebu City Transportation Office (CCTO) ang ilang pag-isyu og delivery permit ngadto sa mga sakyanan nga maghatod og essential goods.
Si Alma Barandog-Casimero, pangulo sa CCTO, nibutyag nga naka-isyu ang ilang buhatan og 4,296 ka delivery permits niining panahon sa general community quarantine (GCQ) ug enhanced community quarantine (ECQ) sukad niadtong Marso hangtod Hunyo 2020.
“Gi-suspend na nato ang issuance of delivery permit effective kagahapon, Hunyo 29. Those nga nakakuha na, mahimo gihapon silang maka-deliver apan kadtong mga walay delivery permit sa Cebu City ato silang pabalikon sa agi,” padayag ni Casimero.
Gipadayag ni Casimero nga kadtong mga delivery vehicle sama sa motorsiklo ug four-wheeled vehicle pataas dili makasulod ug makadeliver sa Cebu City areas kon wala silay delivery permit gikan sa CCTO.
Matod pa sa pangulo sa CCTO nga ila nalang gipabalik sa point of origin ang maong mga sakyanan aron dili ma-isyuhan og violation.
Gisuspenso ang paghatag og delivery permit aron pagkontrolar sa mga sakyanan nga anaa sa karsada sanglit ilang namatikdan nga nanaghan ang mga gustong mokuha og delivery permit ug gigamit aron dili madakpan sa enforcers bisan kon aduna silay laing katuyoan.
Dugang ni Casimero nga kadto sab nga mga delivery permit nga wala ma-renew niadtong Enero lakip sa ilang gipahamtang nga suspension ug dili na sila makadagan hangtod nga dili ma-renew ang ilang permit.
Ang bayad sa delivery permit nagkantidad gikan sa P500 ngadto sa P700 depende sa ilang baligya-on nga i-deliver.
Sagad sa molukat og permit mao kadtong mga motorsiklo nga gigamit sa food delivery sama sa Food Panda, Grab Food, Lalamove ug uban pa.
Ang CCTO kinsa maoy kaabag sa mga pulis ug military sa mga border sa Cebu City estrikto nga nipatuman sa mga guidelines gikan sa Inter-Agency Task Force ug subay usab sa mga executive order ni Mayor Edgardo Labella sa tuyo nga makontrolar ang gidaghanon sa mga sakyanan diha sa kalsada.
Si Lyntoni Sable, chief administrative officer sa CCTO, nagkanayon nga nag-average sila og 200 ka mga apprehension matag adlaw gumikan kay walay driver’s license ug expire ang mga certificate of registration sa sakyanan. (PAC)