MOABOT na sa 69 ka mga kawani sa Cebu City government ang nataptan sa Covid-19 gikan niadtong buwan sa Marso ngadto na sa Hunyo.
Pahibawo ni Atty. Rey Gealon, tigpamaba ni Mayor Edgardo Labella atol sa gipahigayon nga press briefing kagahapon, Hunyo 30.
Sa 69 ka mga kaso sa Covid-19, upat niini ang kumpirmadong namatay diin ang labing uwahi nga casualty si Konsehal Antonio “Tony” Cuenco kinsa maoy nisunod ni Engr. Danilo Gabiana, ang kanhi OIC Department Head sa City Hall.
Sa mga natakdan sa maong virus, 12 ang kanila gikan sa City Health Department (CHD), 19 gikan sa Emergency Medical Service ug 33 ka Barangay Health Workers ug adunay pipila nga wa pa masuta ang departamento.
Ang mga nagpositibo nga wala pa maka-recover padayon sa ilang isolation o home quarantine .
Ang mga namatay gikan sa CHD (1), Department of Public Services (1), Barangay Health Worker (1) ug Sangguniang Panlungsod (1).
Ang kamatayon ni kanhi OIC City Treasurer Arlene Rentuza padayon pang gisubay kon Covid ba ang hinungdan.
Matod ni Gealon nga nasubo si Mayor Edgardo Labella sanglit pulos frontliners ang nataptan sa maong virus gumikan sa paningkamot sa siyudad nga masugpo ang coronavirus disease. (PAC)