NAKUHAAN ang pwersa sa Mandaue City Police Office (MCPO) human nagpositibo sa coronavirus disease (Covid-19) ang ilang 17 ka mga personnel.
Si Police Major Mercy Villaro, public information officer sa MCPO, niingon nga ang mao nga mga pulis gipangkuha na gikan sa ilang tagsa ka balay sa Martes, Hunyo 30, 2020.
Gipangdala sila ngadto sa Mandaue City isolation unit.
Wa mosulti si Villaro kon diin gikan kining mao nga mga pulis.
Bisan pa sa hitabo, gipaneguro ni Villaro nga ang kapulisan sa Dakbayan sa Mandaue magpadayon sila sa ilang trabaho taliwa sa nahitabo sa ilang kaubanan.
“Despite of the situation, wala kaayo siya makahatag og dako og epekto sa atong pagpanarbaho since we have reserves from our headquarters personnel nga sila ang magpuli-puli in the absence of the personnel nga nagpositibo sa Covid,” matod ni Villaro.
Niadtong Hunyo 11, gi-lockdown usab ang Opao Police Station human ang usa sa ilang mga dinakpan nagpositibo sa Covid-19.
Way bisan usa ka personnel nga gipagawas human niini.
Apan matod ni Villaro nga sa labing uwahing swab test, Covid-free na ang mao nga mga pulis ingon man ang dinakpan.
“But as of this time, we are still waiting sa issuance of fit to work order sa atong mga personnel,” dugang ni Villaro.
Ang moisyu sa order mao ang Regional Health Service sa Philippine National Police. Gikinahanglan usab kini aron malibkas na ang lockdown sa mao nga police station. (REV)