DAGHAN kaayo ang nalipay kay lagi, anaa na sa modified general community quarantine (MGCQ) ang Davao City gikan sa usa ka bulan nga GCQ.
Sugod Miyerkules, Hulyo 1, ang siyudad anaa na sa MGCQ, apan wala kini nagpasabot nga ang katawhan, kagasnon na kaayo sa paglaag sa gawas sa balay.
Niini, daw walay kabag-ohan, kay sumala ni Davao City Mayor Sara Duterte-Carpio, bugtong mga tindahan ug mga dagkong establisyemento ang madugang. Sila mangabri. Ang tanang regulasyon sa GCQ, anaa gihapon. Istrikto gihapon nga ipatuman.
Tungod kay nahukman sa Inter-Agency Task Force (IATF) on Covid-19 nga mag-MGCQ na ang dakbayan, nalipay si Mayor Sara niini aron sa ingon hinayhinay nang mabalik ang normal nga komersyo.
"Personally wala ko nag-expect nga mag-MGCQ. Although nag-andam kita for an MGCQ, pero ang akoang expectation since duna kitay positive cases everyday, naa ra ta sa GCQ. Apparently, upon assessment sa pag-apply nila og formula for quarantine, puwede [diay] ta misulod sa MGCQ,” ingon ni Mayor Sara atol sa radio interview niini kagahapon.
Kay MGCQ na ang Davao, dili gyud mukompiyansa, basin unya maparihas ang Davao City sa nahitabo sa Cebu City, gikan sa MGCQ, apan gibalik na hinuon sa ECQ kay lagi, daw kompiyansa kaayo sa MGCQ.
Ang pagtuman sa mga gipasunod sa otoridad maoy labing dako nga himan sa pagpukan sa coronavirus disease.
Motuman kita, di magginahi sa ulo ning mga panahona.