SAMA sa akong pangagpas niadtong atong lindog sa adlaw’ng Martes, Hunyo 30, nga posibleng lugwayan ang pagpaubos sa enhanced community quarantine (ECQ) ang dakbayan sa Sugbo, nahitabo gyud. Gipahibawo ni Presidente Rodrigo Duterte ang bag-ong quarantine status sa mga nagkalain-laing local government units (LGUs) lukop nasud. Ang Cebu City ubos gihapon sa ECQ sa mosunod nga 15 ka adlaw gikan sa Hulyo 1 hangtod sa Hulyo 15. Samtang general community quarantine (GCQ) gihapon sa Mandaue City, Lapu-Lapu City, Talisay City, Minglanilla ug Consolacion ug ubos na sa modified general community quarantine ang ubang bahin sa lalawigan sa Sugbo.
Mao na kini ang ikatulong higayon nga ang dakbayan gipa-ubos sa ECQ. Unang ECQ niadtong Marso 28 hangtod sa Mayo 31. Unya gipa-ubos na unta kita sa general community quarantine (GCQ) niadtong Hunyo 1 hangtod sa Hunyo 15. Apan unsa bang pagka-unsaa nga gibalik na man pod kita sa ECQ niadtong Hunyo 15 hangtod sa Hunyo 30.
Kini nunot sa nagkataas nga kaso sa coronavirus disease (Covid 19). Bisan kon gipa-ubos kita sa ECQ diin hugot ug gi-estrikto ang gipatuman nga mga polisiya, apan misaka naman hinuon og maayo. Daghang mga rason nganong misaka og maayo ang mga kaso. Daghan ang mga gahig ulo nga wala mosunod sa mga protocols. Base sa talaan niadtong Martes, miabot na ngadto sa 5, 494 ka mga kaso.
Nunot niining deklarasyon sa ECQ, gianggaan ang Sugbo nga maoy adunay pinakataas nga ECQ period o lockdown. Dili na siguro angay pa nakong batbaton dinhi kon unsa ang atong ekonomikanhong kahimtang niadtong mga adlaw nga gipa-ubos kita sa ECQ. Naglisod ang halos tanan labi pa kadtong nawad-on og mga trabaho kay way laing tinubdan sa panginabuhian.
Halos tanan nagsalig lang sa ayuda gikan sa kagamhanan nga wala poy klaro ang distribution gumikan kay gisagulan og pamulitika. Agwanta lang gihapon ta kay kita ra man usab ang mabasol niini. Lain na usab nato kining kalbaryo nga atubangon dala ang paglaum nga makabangon ra kita gihapon. (bobbygnalzaro@gmail.com)