LALAKENG nagsuroysuroy nilandig sa tambalanan human pusila sa iyang silingan niadtong Martes sa alas 11 sa gabii, Hunyo 30 sa Poblacion Pardo, Dakbayan sa Sugbo.
Si Police Corporal Jeymus Tordios sa Pardo Police Station niila sa biktima nga si Christian Ababon, 18, lumolupyo sa dan I. Tabura sa Sityo RCYO, Barangay Poblacion Pardo.
Matod ni Tordios nga si Ababon padung na mopauli dihang gisugat siya sa suspek nga giilang si Owen Villegas, silingan.
Si Villegas nipusil kang Ababon sa way igong hinungdan.
Si Ababon kinsa nisuway pagdagan naigo sa sampot ug ang bala milapos sa iyang bugan.
Daling gidala sa Cebu City Medical Center (CCMC) si Ababon samtang si Villegal nakaeskapo.
Napalgan sa crime scene ang lima ka mga kabhang sa 9mm nga pistola nga hayan maoy gigamit ni Villegas sa pagpusil kang Ababon.
Wa pa masayri sa kapulisan kon unsa ang motibo sa pagpusil ni Villegas sa iyang silingan. (BBT)