ALANG sa paspas ang pagpangita og plasma donors, mihimo ang Dakbayan sa Mandaue og pool of convalescent plasma donors gikan sa nakarekober na nga mga pasyente sa coronavirus disease 2019 (Covid-19).
Sa miaging semana, adunay usa ka Covid-19 patient sa Cebu Doctor’s Univeristy Hospital (CDUH) nga nakarekober sa maong sakit human gipaubos sa Hybrid Therapeutic Plasma Exchange and Convalescent Plasma Therapy.
Mao kini ang labing una nga pasyente nga nakarekober tungod sa maong paagi hinungdan nga miawhag ang mga hospital ngadto sa mga nakarekober sa Covid-19 sa pag-donate sa ilang plasma.
Ang plasma nga makuha gikan sa Covid-19 survivor idapat ngadto sa masakiton sa Covid-19 nga kritikal ang kahimtang.
Bisan wa pa kini kongkretong pagtuon, usa kini sa mga paagi nga gitugot sa Department of Health (DOH) 7 sa pagkombate sa Covid-19.
Pinaagi sa pool of convalescent plasma donors, usa ka database ang gamaon alang sa tanang Covid-19 patients sa dakbayan aron mapadali ang pag-partner sa donor ug ang recipient nga nanginahanglan sa therapy, matod ni Atty. John Eddu Ibañez, executive secretary ni Mandaue City Mayor Jonas Cortes.
Ang database ihandos ngadto sa Vicente Sotto Memorial Medical Center Bloodbank.
Sa pakighinabi sa Superbalita Cebu ni Mandaue City Councilor Nerissa Soon-Ruiz, chairwoman sa committee on health sa konseho, nga uyon siya sa pagbutang og kaugalingong data base sa dakbayan, apan mas labing maayo unta kon nakuha sab ang blood type sa mga pasyente.
Dugang ni Ruiz nga wa makuhai ang mga pasyente sa ilang blood type tungod kay wala sa protocol sa Department of Health (DOH).
Gipasabot ni Ruiz nga sa panahon nga mag-donate na og plasma o dugo kinahanglanon niini ang blood type.
Apan bisan pa man, malipayon gihapon si Ruiz nga anaa nay database ang dakbayan ug nanghinaot siya nga maapil na ang ubang detalye nga kuhaon sa panahon nga adunay mag-donate og plasma ngadto sa nanginahanglan niini. (KFD)