Mga traysikol driver makadakop sa way mask, pass

(Lapu-Lapu City Public Information Office)
(Lapu-Lapu City Public Information Office)

MGA traysikol drayber sa Dakbayan sa Lapu-Lapu i-deputize ni Mayor Junard Chan nga mamahimong makapanakop sa mga tawo nga wa magsul-ob og face mask ug way quarantine pass, apan naglaroy-laroy sa gawas.

Kagahapon, Hulyo 1, gilusad sa Kagamhanan sa Dakbayan sa Lapu-Lapu ang Rekovida kun Rekorida Kontra Virus sa Dakbayan ubos sa pakig-alayon ngadto sa 80 ka mga traysikol drayber nga magsilbing Covid warriors.

Kini gipasiugdahan ni Chan ingon man sa hepe sa City Social Welfare and Development, Annabeth Cuizon, diin sa pagsuroy-suroy sa maong mga traysikol drayber sa ilang pagpamasad,a ipalanog niini ang recorded audio mahitungod sa coronavirus disease ug pagbadlong niadtong way face mask nga gisul-ob lakip na sa mga Qpass.

Sa maong paagi, makatabang sab kini sa maong mga drayber sa ilang panginabuhi-an kay magdawat sila og tag-P400 ang adlaw, sud sa usa ka buwan nilang pag-alagad isip Covid warriors sa kadalanan.

Gipahibawo sa mayor nga ang pagtinabangay ug disiplina ang epektibo nga paagi aron hingpit masumpo ang pagkuyanap sa virus, ilabi na nga mitala nga ngadto sa 27 ka tawo sa Lapu-Lapu ang nakalas sa Covid-19.

Nipasalig si Chan nga iyang ipaabot ngadto sa konseho sa dakbayan nga i-deputize ang mga traysikol drayber nga makahimo og citizen’s arrest niadtong maatlan nga wa magsul-ob og facemask ug way mga Qpass.

“Kon P1,000 ang multa nga bayran sa violators, hala tunga mo. P500 sa Siyudad ug P500 sab ngadto sa traysikol drayber nga nakadakop,” pasabot ni Chan sa mga traysikol drayber nga miabiba sa maong paagi. (FVQ)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph