Barangay isolation centers di ipagamit

DI NA pabutangan ni Environment Secretary Roy Cimatu ang barangay isolation centers (BIC) nga naa sa tunga-tunga sa mga barangay nga nagdasok ang mga tawo.

Iya na kining ipadiretso og dala ngadto sa Noa complex sa South Road Properties (SRP).

Kini aron makuhaan ang kabalaka sa komunidad diin nahimutang ang BIC nga maoy gituohan nga maoy hinungdan sa pagdaghan sa mga kaso sa Covid-19 kay naa sa lugar nga daghan og mga tawo.

“Kung meron pang bagong darating na bagong infected (sa Covid), ay hindi na pupunta sa isolation centers. Doon na sa ginawa natin doon sa Reclamation (South Road Properties), doon sa may tabi nang dagat. Doon na pupunta para dahandahan mabawas na yon sa isolation centers,” padayag ni Cimatu

Giklaro ni Cimatu, chief overseer sa Pandemic Covid 19 Response sa Dakbayan sa Sugbo, nga adunay mga BIC nga iyang nakita nga maayo ang pagkabutang.

Gusto ni Cimatu nga mapun-an ang 350-bed capacity sa Noa complex. Dugang niya nga kon di mapaigo ang bag-ong mga pasyente sulod sa Noa complex, mamahimong ibutang sa coliseum.

Sa Siyudad sa Sugbo, duha lang ang mga coliseum nga mao ang New Cebu Coliseum ug Aznar Coliseum.

“Yong isolation center ay dahandahan nang nabawasan, mas marami nang lumalabas kay sa pumapasok. That is an indication na nag i-improve na ( ang kondisyon),” dugang ni Cimatu.

Ang mga tunghaan gigamit nga barangay isolation centers sa asymptomatic nga mga pasyente. Sagad sa mga tunghaan naa sa sentro sa mga barangay. Nagtuo si Cimatu nga usa kini sa mga hinungdan nganong taas ang mga pagpanakod sa Covid-19 sa mga komunidad.

Bisan pa niini, nagtuo si Cimatu nga makalingkawas na sa ECQ status ang Cebu City sa Hulyo 15.

Si Department of the Interior and Local Government Secretary Eduardo Año, nagkanayon nga sila gusto nang mawagtang ang quarantine protocol sa mga dapit sa nasod aron makabangon na ang ekonomiya.

Nanghangyo siya og kooperasyon sa katawhan.

“Gusto natin lahat ng mga LGUs maka-graduate sa quarantine classifications because we need to open our economy. Let us just wait and see the data and make the recommendation to the President,” matod ni Año.

Si Mayor Edgardo Labella niingon nga gusto unta siyang lugakan ang quarantine protocol, apan alang kaniya kinahanglan balansehon ang ekonomiya ug kinabuhi sa tawo.

Si Labella niingon nga nasayod siyang kinahanglan nang mobukas ang ekonomiya alang sa panginabuhian sa katawhan ug pagbuhi sa mga patigayon taliwa sa dautang epekto sa quarantine. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph