ARON malikayan ang panagtapok subay niining pagpanghatag sa ikaduhang hugna sa Social Amelioration Program (SAP) sa mga benepisyaryo niini, himuon sa Department of Social Welfare and Development (DSWD) ang digital payment isip paagi sa payout nga magsugod sunod semana.
Kini human napinalisar na sa DSWD pinaagi sa Bangko Sentral ng Pilipinas (BSP) ang Memorandum of Agreement tali sa nagkadaiyang financial service providers (FSPs).
Ang digital payment kini ang makabag-ong pamaagi sa pag-transfer sa kwarta pinaagi sa mga nagkadaiyang FSPs aron madawat kini sa usa ka tawo pinaagi sa iyang virtual wallet o diretso mismo sa iyang bangko.
Sa pagkakaron aduna'y unom ka FSPs nga gisuta sa BSP nga misunod sa minimum qualification requirement tali niining kasabutan.
Naglakip kini sa GCash, RCBC, Robinsons Bank, PayMaya, Starpay, ug Unionbank.
Matod sa DSWD nga pabilin nga ang Land Bank of the Philippines (LBP) ang main depository bank ug mao ang mo-download sa kwarta sa FSPs.
Sulod sa 24 oras dihang nadawat ang FSPs ang kwarta, ilaha kining i-credit o ibutang sa accounts sa mga SAP beneficiaries.
Subay niini gipahibawo sa DSWD-Central Visayas nga possible nga sunod semana na masugdan ang second tranche sa Cebu.
Matod ni Shalaine Lucero, ang DSWD-Central Visayas assistant regional director, nga naghuwat nalang sila sa kompirmasyon kon asa sa 132 ka local government unit sa rehiyon ang malakip sa second tranche.
Aduna'y sumatotal 585,376 ka mga dili miyembro sa Pantawid Pamilyang Pilipino Program (4Ps) diin giisip kini nga labing kabus sa Sugbo ang qualified sa SAP second tranche.
Ang matag beneficiary makadawat og P6,000 o sumatotal nagkantidad kini og P3.5 bilyones.