SA KATUYOAN nga mapanalipdan ang panglawas sa gikabalak-an nga coronavirus disease nga mitay-og tibuok kalibutan, bisan unsa nalang nga tuo-tuo ang gihimo sa paningkamot nga dili mataptan sa sa maong virus.
Ang World Health Organization (WHO) mipahinundum ug mipahimangno sa publiko sa mga angayan ug dili angayan buhaton batok sa Covid-19.
Mipagawas ang WHO og laing hugna sa “Coronavirus disease advice for the public: Myth busters.”
Sa maong paagi magiyahan ang katawhan sa husto nga paagi nga malikay sa virus ug dugang kahibawo mahitungod niini.
MA-ULIAN RA
Sa kadtong nataptan sa virus dako ang tsansa nga ma-ayo pinaagi sa husto nga medikasyon ug dili magpundo ang virus diha sa lawas hangtod sa hangtod.
Sa higayon nga maayo ang pasyente mawala na sab ang Covid-19 diha sa iyang lawas sukwahi sa pagtuo sa uban niadtong Covid survivor ang likayan tungod sa kahadlok nga matakdan.
Wagtanga sab ang pagtuo nga kon magpa-init sa adlaw o ang pag-expose sa kaugalingon sa temperatura nga 25 degrees Celsius o pataas dili mataptan sa virus.
Base sa talaan sa WHO adunay daghang nagka-Covid sa mga nasud nga adunay tropical weather condition.
“To protect yourself, make sure you clean your hands frequently and thoroughly and avoid touching your eyes, mouth, and nose,” bugtong maka-protect aron luwas sa maong virus.
Subling gipahibawo ang sayop nga pagtuo sa pipila mahitungod sa thermal scanner nga gamiton sa higayon mosulod og edipisyo o publikong lugar.
Dili maka-detect ang thermal scanner niadtong tawo nga adunay Covid-19 apan masuta lang niini ang body temperature kon adunay gihambin nga hilanat nga usa ka tawo nga simptomas sa coronavirus disease.
DI MATAKDAN
Laing gitataw sa mga eksperto nga ang Covid-19 dili ma-transmit pinaagi sa sa langaw.
“To date, there is no evidence or information to suggest that the COVID-19 virus transmitted through houseflies,” natala sa myth buster sa WHO.
Dili sab mokatap ang virus pinaagi sa 5G mobile network kon radio waves.
Apan respiratory droplets gikan sa infected nga pasyente pinaagi sa pag-ubo, hatsing, o bisan sa pagtabi usa sa paagi nga makatakod ngadto sa laing tawo.
Samtang balanced diet ug pabiling hydrated uban pang paagi sa healthy lifestyle aron dili dali matakdan.
Dili ang pagbutang og halang o pepper sa matag pagkaon makapanalipod o maka-ayo sa Covid kay kuno makapatay sa virus ang halang, hugtanon kining gisalikway sa mga doktor nga pagtuo.
FACE MASK
Sa mga health buff diin ang matag local nga kagamhanan mipahinumdum sa ilang mga konstituente nga kanunayon ang pagsul-ob og facemask, gikinahanglan ba gihapon nga naka-facemask kadtong mag-exercise?
Sigun sa WHO nga dili kinahanglan nga magsul-ob og facemask atol sa pag-ehersisyo gawas nga lisod ang pagginhawa, ang singot nga moresulta sa pagkabasa sa mask adunay mamugna nga microorganism nga dili maayo sa panglawas.
Magtamod lang sa physical distance ngadto sa uban nga nag-ehersisyo maoy solusyon.
Gisalikway sab sa mga eksperto nga ang taod-taod nga pagsul-ob og medical mask nga maoy rason sa carbon dioxide (CO2) intoxication ug ang kakuwang sa oxygen.
Bisan tuod nga ang dugayng ginamit sa surgical mask gihulagway nga uncomfortable, apan dili kini maoy hinungdan nga mahilo ang user sa iyang kaugalingong CO2 nga gibuga.
“Make sure it fits properly and that it is tight enough to allow you to breathe normally. Do not re-use a disposable mask and always change it as soon as it gets damp,” tipik sa pahinumdum sa WHO.
Ang pagtamod sa mga safety protocol nga gipatuman sa kagamhanan ingon man ang disiplina sa matag usa ang labing epektibo nga taming batok sa Covid-19.