"AYAW kaayo palabi, mga Besh, kay wala ta kabalo unsay dangatan nato after July 15."
Kini akong nadungog sa akong mga barkada dihang nanglakaw kami sa Hulyo 1 sa unang adlaw diin anaa na sa modified general community quarantine (MGCQ) ang Davao City hangtud Hulyo 15.
Giingnan nako sila nga di ta kompiyansa, kay ang Cebu City bitaw, after sila nag MGCQ, gibalik sila sa istriktong Enhanced-CQ kay lagi misulbong ang kaso sa coronavirus disease (Covid-19).
Wala pa nato masayri nga sa Hulyo 16, simbako lang basin ibalik ta sa ECQ kay lagi, nagkataas man gihapon ang kaso sa Davao City. Ampo lang ta ani nga moubos na gyud.
Sa laing bahin higala, daghan karon ang mga negusyo nga nagsira, nalugi hinungdan nga nanaktak og mga empleyado. Namayad sila, alangan di sila mobayad, magukod sila sa gobyerno.
Daghan kaayo ang nadamay aning Covid. Daghan kita og mga nakat-onan, usa na niini ang pagpabilin sa kahinlo sa panimalay, sa panglawas ug ang kapait sa pamuyo.
Sa MGCQ higala, di kaayo kompiyansa ha, amping gihapon. Ipabilin gayod ang social distancing ug ang pagsuot og face mask labi na kung naa sa publiko.
Di nato hulaton, mga beshy, mga Ka-Super, nga mosamot pa ang pagdaghan sa natakdan sa Covid, motabang kita sa paningkamot sa gobyerno sa pagbatok sa kalaban nga di makita.
Sa mga nagdahom nga MGCQ na, puwede na sila kahimo sa naandan nga gimbuhaton ug sa naandan nga batasan sa laag, kana ang di puwede higala, kay sama gihapon ta sa ECQ, lamang nadugang lang ang pag-abli sa mga establisyemento.
Di kaayo nato i-feel ang MGCQ kay tanang regulasyon sa ECQ naa gihapon kadto, ipatuman gihapon. Busa, amping gayod ug maningkamot kita nga sa Hulyo 15, lugway gihapon sa MGCQ ug mas maayong mawala na gayod. Di nata mosugot nga mobalik pa sa ECQ.
Sunod tsika na sab, amping kanunay mga Super Suki.