GAMAY nga ulan, mobaha ang Dakbayan sa Davao. Usa sa mga problema ning siyudad nga hangtud ning mga gutloa wala gyod nahatagan og solusyon.
Bisan pa nga gikan sa miaging tuig hangtud karon, okupado kaayo ang Department of Public Works and Highways (DPWH) sa pagkambyo og mga dagkong culvert, apan baha lang gihapon.
Usa sa mga bahaunon gyud sa Davao kining Ramon Magsaysay Avenue (Uyanguren), Matina Aplaya, Jose P. Laurel Avenue (Bajada), dapit sa SM Lanang, Tulip Drive sa Mc Arthur Highway (Matina), ug sa ubang low-lying coastal areas.
Karon kay ting-ulan na, mobalik ang problema. Kay bisan unsaon og padako sa mga culvert, kining emburnal, kawang gihapon tungod kay ang katawhan wala nadisiplina sa paghipos sa ilang basura.
Basura sa katawhan ang mapasanginlan tungod kay mao man kini ang nakita nga rason, mihuot sa kanal, hinungdan mapugngan ang tubig--resulta baha.
Usa ka environmentalist nga si Museum Curator Darrell Blatchley, sa miaging tuig, nag-trending kay iyang gipakita sa social media nga sinako ang mga basura nga iyang nakuha gikan sa mibara nga kanal.
Sa ato pa, basura nga gipasagdan sa katawhan ang hinungdan sa baha. Katawhan raman diay ang hinungdan sa pagbaha. Katawhan ra sab ang makahimo nga malikayan ang pagbaha.
Bisan pa og kusog kaayo ang bunok sa ulan kung wala la'y basura nga mibara sa mga kanal, gawasnon kaayo ang tubig nga modagayday ngadto sa dagkong kanal padung sa Bucana, ngadto sa dagat.
Disiplina ang kinahanglan, labi na diha sa mga basura aron di kita makasinati og mga pagbaha.