DAVAO DEL SUR -- Namatikdan nga daghan na ang nahimong pasaway pinaagi sa wa pagtuman sa mga protocols sa Inter-agency Task Force (IATF) on Covid-19.
Kini human nga padayon gihapong gipailawom sa modifiedgGeneral community quarantine (MGCQ) ang probinsiya.
Gawas niini, daw nakalimtan sab ang social distancing apil ang mga paggamit og mga sanitizers.
Sa lungsod sa Bansalan, gibutyag ni alyas Lisa, 23, nga daghang mga karenderya ang wa magbutang og sanitizers human gitugtan na ang pagkaon sa sulod.
Sa datus sa IATF-Covid-19, lima na lang ang aktibong kaso sa 21 ka nataptan sa kagaw sa probinsiya human 16 na ang nakarekober.
Sa maong ihap, tulo niini sa lungsod sa Sta. Cruz, ug tag-usa ka kaso ang Hagonoy ug Malalag.
Sa Dakbayan sa Digos, gitataw sa City Health Office nga nakarekober na ang 10 ka tawong nag-positibo sa Covid-19.
Daghang masinupakon sa balaod sab ang gisikop sa Digos City Police Station.
Sumala ni Lieutenant Vici Anthony Tababa, hepe sa DCPS, nga gipailawom nila sa lecture ang mga tawong milapas sa Executive Order Number 41 sa amahan sa siyudad kun mandatory wearing of face mask ug pag-obserba sa social distancing.