MASINUPAKON sa mga sumbanan sa general community quarantine (GCQ) sa Dakbayan sa Davao niabot og 1,000, base sa taho sa Davao City Police Office (DCPO).
Gibutyag ni DCPO Director Colonel Kirby John Kraft nga mga 1,026 indibiduwal ang nadakpan tungod sa paglapas sa GCQ guidelines.
Kasagaran nga nadakpan o mga 650 indibiduwal mga nakalapas sa Food and Medicine pass. Gisundan kini sa pagsupak sa curfew hours nga naa sa 184, liquor ban sa 112 ug mass gathering sa 80.
Gisulti ni Kraft nga mga 411 ka kaso ang napasaka na sa korte.
"Yung mga naaaresto po natin na nag-viviolate ng quarantine guidelines, dinodocument po natin sila. Hindi po natin sila kinukulong. Nahohold lang po sila sa police station then after documentation, marerelease din," pagtin-aw niya.
Samtang ang Vices Regulation Unit (VRU) nakadakop sab og mga 84 ka malapason sa liquor ban.
Sa taho gikan sa City Information Office, ang DCPO ug VRU nasikop og 196 indibiduwal nga namaligya ug nag-inom og alak.
Sumala ni Kraft nga mga report gikan sa concerned citizens nga maoy hinungdan sa pagkasikop sa mga masinupakon.
Gitug-an sab ni VRU head Dr. Ashley Lopez nga mga ilimnong makahubog ginabaligya na sab sa online nga maoy ilang gimonitor karon.