DAVAO DEL NORTE -- Duha ka security guards ang napatay human nga giatake ang Puyod Banana Farm og gibanabana 80 ka mga armadong grupo sa Purok 6, Barangay Mabuhay, Carmen alas 8:30 sa buntag niadtong Miyerkules, Hulyo 1, 2020.
Apan mga armadong grupo napatyan sab og duha samtang lima ang nasamdan ug 18 ang mga nadakpan atol sa hitabo.
Mga namatay nga security guards giila nga sila Kenneth D. Cabasingan, hamtong ang pangedaron, minyo, molupyo sa Mabini, Davao De Oro ug Erben E. Rosalin, hamtong ang pangedaron, minyo, taga Barangay Panibasan, Maco, Davao De Oro, pulos ilawom sa Cross Fire Security Agency.
Samtang ang napatay nga mga armado nailhan sab nga sila Alijo Ecat Villa, 69, minyo, laborer, molupyo sa Purok 5, Barangay Manay, Panabo City nga gideklarang dead on arrival sa Rivera Medical Hospital sa siyudad sa Panabo ug alyas Jun Ortega, hamtong ang pangedaron nga taga New Israel, Makilala, North Cotabato.
Mga nasamdan gidala sab ngadto sa Rivera Medical Hospital apan wa madugay gibalhin ngadto sa Davao Regional Medical Center sa Siyudad sa Tagum nga giila nga sila Angelito Balaga Suarez, 39, Marjon Villa Adlaon, 33, ulitawo, Carpio Ecat Villa, 48, ulitawo, Leon Villa Dumanda, 59, minyo, ug Flavio Censico Villa, hamtong ang pangedaron parehong mga laborer nga taga New Israel, Makilala.
Sa pakighinabi sa SunStar Superbalita, gikanayon ni Police Major Jay Nocidal, chief of police sa Carmen Municipal Police Station, nga mga nahisgutang grupo nalambigit sa ilegal nga nisulod sa maong plantasyon niadtong Enero karong tuiga apan naharang sa mga guwardiya kung diin uban kanila nadakpan usab.
Gisulti ni Nocidal nga sa 18 nga nadakpan, 12 niini taga Panabo City, lima taga Carmen mismo samtang ang usa taga Dakbayan sa Davao nga giingong mga kanhi trabahante sa maong plantasyon.
Base sa inisyal nga imbestigasyon, nahitabo ang engkuwentro sa mga armadong grupo nga dala ang mga di matino nga matang sa armas ug mga mahait nga hinagiban sa plantasyon nga gipanag-iyahan sa pamilyang Puyod human nga mga guwardiya nisukol kanila aron nga panalipdan ang lugar.
Daling nakaresponde ang mga sakop sa Carmen Municipal Police Station, inubanan sa mga personahe sa Davao del Norte Police Provincial Office nga gipangulohan ni Police Colonel Ranie P. Hachuela ug uban pang yunit nga miresulta sa pagkasikop sa 18 ka mga suspek kinsa positibo nga giila sa ubang mga security guards nga apil matud pa sa miatake kanila.
Samtang ang lain pang mga suspek padayong gipangita human giingong misibat dala ang mga armas nga ilang nailog gikan sa mga sekyu sa maong plantasyon.