UNA magsugod sa iyang tahas isip officer-in-charge (OIC) sa Philippine Sports Commission (PSC), ang Sugbuanon nga basketball legend Ramon “El Presidente” Fernandez mipaubos sa swab test didto sa kaulohan.
Si Fernandez, kinsa usa ka PSC Commissioner, anaa karon sa kaulohan human ma-appoint isip OIC sa PSC.
Siya ang temporaryong gihulip kang chairman William “Butch” Ramirez sugod niadtong Hunyo 22, 2020 hangtod Hulyo 17, 2020.
Si Ramirez nag-leave aron bantayan iyang asawa nga niagi og gall bladder bile duct operation.
Ang four-time Most Valuable Player (MVP) ug 19-time champion sa Philippine Basketball Association (PBA) milarga paingon sa Manila ning bag-uhay lang para ipadayon ang mga programa sa PSC.
Sa iyang pag-abot, giuna dayon ni Fernandez ug sa iyang asawa nga si Karla Kintanar-Fernandez nga magpa-Polymerase chain reaction (PCR) Test para sa coronavirus disease 2019 (Covid-19).
“First order of the day: PRC Test! Especially (we’re) coming from the epicenter, Cebu City. We want to make sure we are cleared for everyone here to feel safe with us. God bless us!,” matod ni Fernandez sa iyang Facebook post.
“We will comply with the standard procedures to ensure that we are helping in curbing the spread of the virus.”
Si Fernandez ug iyang asawa mokompleto sa 14-day quarantine period.
Isip OIC, si Fernandez nagkanayon nga iyang ipadayon ang mga programa sa PSC ug usa na niini ang paggiya sa Olympic qualifiers ug mga atleta nga nangandoy mo-qualify sa 2021 Tokyo Olympics.
Sa pagkakaron adunay upat ka mga atleta ang Pilipinas nga naka-qualify alang sa labing dakong kompetisyon sa paugnat sa kusog sa kalibutan.
Gipangtumbok mao ang mga boksidor nga sila si Eumir Marcial ug Irish Magno, pole vaulter EJ Obiena ug gymnast Carlos Yulo.
Aduna pay mga atleta nga nanghinaot nga makalusot sa Olympic qualifying event.
Si Fernandez naabot sa kaulohan niadtong Lunes gikan sa Cebu City. Siya naniguro nga moagi sa swab test tungod sa pagpadayon og saka sa mga kaso sa Covid-19 sa Cebu City.
Ang Cebu City adunay 5,596 kompirmadong mga kaso sa coronavirus- 2,519 ka mga aktibo ug 2,987 ang naka-recover – basi sa datos sa Cebu City Health Department.
Ang Cebu City nagpabiling ubos sa Enhanced Community Quarantine (ECQ), ang labing esktrikto nga quarantine measure.