ABI ba to nakog sa di madugay mahibalik na sa kahanginan ang ABS-CBN ug makita na usab ang mga gikalingawan nga mga programa niini.
Nalipay na lang unta ko nga nibalik ang It’s Showtime ug ubang programa sa digital station niini nga Kapamilya Channel.
Nakaingon ko nga hapit na tingali makabalik ang Kapamilya Network labina kay gi-apil baya sa DepEd ang radyo ug telebisyon sa ilang gitawag nga blended learning.
Magluksolukso man hinoon ko sa ABS-CBN, GMA 7 ug uban pang istasyon depende lang sa unsay gusto anang higayona. Usahay inig scan sa mga channel mo-ungot ko sa Nickelodeon, Boomerang, Disney ug Cartoon Network kon lingaw ang gisalida.
Giingon gud nga naa pa gihapon ang pagkabata sa tagsatagsa kanato bisan pila nay edad.
Nakurat na lang ko adtong Miyerkules dihang kalit nga gitsugi ang mga cable service providers nga Sky Cable ug Sky Direct lakip na ang TV Plus tungod sa Cease and Desist order sa NTC.
Di ko kasabot aning National Telecommunications Commission nga niisyu og statement nga way kalapasan ang TV Plus unya pagka sunod adlaw, gitsugi. Pagtsur mo uy!
Sa paghanaw sa Sky Cable, Sky Direct (nga maoy akong provider) ug TV Plus, wa na gyuy gamit ang akong TV. Nakahinumdom ko sa video diin gilabay sa usa ka tag-iya ang iyang TV ngadto sapa isip pagpahungaw sa iyang kalagoot nga nawala na ang FPJ’s Ang Probinsyano.
Nakahunahuna kong mosunod sa iyang gibuhat pero pagkataudtaud nakaamgo ko nga wa man diay sapa sa among dapit sa Oslob. Haha!
Pagkaugma, nikontak ko sa nagtaud sa Sky Direct sa balay kon unsay iyang ikasugyot. Niingon siya nga tambag sa ilang opisina nga pahulaton lang sa pagbalik sa ABS-CBN.
Pangutana: kanus-a man? O di ba: makabalik pa kaha? Paet!
* * *
Duha o tulo ba to ka adlaw ning niaging semana nga wa koy abli-abli sa Facebook tungod kay nagbangutan ko sa pagpanaw sa pila ka mga higala.
Laing hinungdan mao nga hapit tanang mabasa nato nga mga post may kalabutan sa Covid-19. Puol ug makadugang sa stress. Kon sa akong kinugos pa sa bata pa siya, “Maypa pagngon!”
Sa laing bahin, nalipay ko nga gipasirad-an una ni Gob. Gwen Garcia ang mga edipisyo sulod sa compound sa Kapitolyo sa tulo ka adlaw aron ma-disinfect ang mga opisina.
Daghan baya kog mga kauban sa buhat nga nagtrabaho pa didto. Gawas sa gihimong disinfection, motuman gyud ta sa mga pahimangno sa pagsul-ob sa face mask, pagpanghunaw ug pagbaton sa social distancing.