MAKAALARMA ang taho nga, sa usa lang ka adlaw niadtong Hunyo 30, 353 ka mga residente sa Cebu City ang nagpositibo sa Covid-19. Labaw pa tingaling nakugang niini ang mga sakop sa Inter-Agency Task Force for the Management of Emerging Infectious Diseases (IATF-MEID) didto sa kaulohan.
Kay nisaka ang gidaghanon sa Covid-19 bisan kon gipadala na sa Presidente dinhi sa syudad sa Sugbo si Heneral Roy Cimatu, ang kalihim sa Department of Environment and Natural Resources (DENR) ingon man dugang mga sakop sa kapulisan ug labi na sa mga sakop sa Special Action Forces (SAF).
Mosamot ang reputasyon sa kagahi’g ulo ug pagkasuberbiyo sa mga Cebuano. Mao kini ang kinatas-an nga gidaghanon sa Covid-19 nga natala sa siyudad sa usa lang ka adlaw. Apan sakto ba ang maong numero nga nigawas sa mga taho?
***
Abtik nga gikorehian ni Cebu City Mayor Edgardo Labella ang maong taho. Matod pa niya, di kini resulta sa swabbing sa usa lang ka adlaw, resulta kini sa swabbing nga gihimo sa Cebu City Health Department (CCHD) sukad pa niadtong Hunyo 22 apan ang resulta nigawas diha pa sa Hunyo 30.
Gidasonan kini ni Dr. Jaime Bernadas, direktor sa Department of Health (DOH) 7. Matod niya, ang data sa pipila ka adlaw natingob ug gipagawas sa Hunyo 30. Angay tingali nga ma-harmonize ang data nga ipagawas sa DOH 7 ug sa CCHD aron di mosamot kakugang ang mga residente sa syudad nga dugay nang nag-antos sa lockdown.
Tiaw mo kon kadtong maong gidaghanon ang basihan, kuyaw nga mahimong forever ang lockdown sa syudad sa Sugbo. Klaruhon unta kon hain kadtong resulta sa pipila ka mga adlaw nga natingob ug kadtong sa usa lang ka adlaw.
***
Si Secretary Roy Cimatu, nga maoy nagdumala sa tanang Covid-19 response sa Sugbo, niingon nga ang IATF-MEID mogamit sa data sa syudad samtang gi-harmonize pa ang data sa syudad ug sa DOH 7.
Laing nitumaw nga suliran mao ang gireklamo sa pipila ka mga barangay captains nga dugay silang gipahibawo sa mga resulta sa Covid-19 sa ilang mga barangay. Niresulta kini sa kalangay sa pag-isolate sa mga pasyente nga natakdan sa Covid-19.
Si Cimatu niingon usab nga ang mga barangay isolation centers (BICs) nga sagad mahimutang sa sentro sa populasyon hayan maoy hinungdan sa pagkatap sa infection. Busa gamiton na sa syudad ang 350-bed nga New Normal Oasis for Adaptation and a Home (Noah) sa SRP isip bag-ong isolation center sa mga asymptomatic Covid-19 patients.