HOTSPOT sa coronavirus disease infections ang Dakbayan sa Sugbo, matod ni Presidente Rodrigo Duterte. Ang Cebu City maoy dunay labing taas og mga kaso sa Covid-19 sa tibuok nasod. Bugtong dapit sa Pilipinas nga naa sa enhanced community quarantine (ECQ) tungod sa kataas sa mga kaso sa Covid.
Di lang kay kini ang giatubang nga problema sa Siyudad sa Sugbo. Daghan og reklamo nga nagkuwang ang QR-coded nga quarantine pass. Daghang mga panimalay ang wa makadawat. Ang QR code wa mo-function kay kon i-scan, wa may mogawas nga impormasyon sa nagkupot sa pass. Maora lang og nagkuha og hulagway ang scanner sa QR code.
Kining mga suliran nga giatubang sa Siyudad sa Sugbo giduwaan og maayo sa mga kritiko ug kaatbang ni Mayor Edgardo Labella. Nagpintal nga dunay kaguliyang sa City Hall.
Di unta tingali magkaguliyang ang paggamit sa QR code kon wa kini gidali-dali paggama. Hayan, mas maayo pagkahimo ang QR kon nagpatabang ang Siyudad og volunteers nga IT experts. Seguradong dunay sector sa information technology nga andam motabang sa Siyudad.
Nganong ang Department of Health (DOH) 7 man ang gihimong tinubdan sa numero sa mga panimalay? Wa ba diay kaugalingong data base ang Siyudad sa Sugbo pinaagi sa City Health Department o kaha ang Association of Barangay Councils nga mas dunay direktang kasayuran sa ilang mga konstituente?
Tungod baya sa kapaspas sa paglambo sa Dakbayan sa Sugbo, ang census sa 2018 duna nay dakong kalainan sa 2020. Unsa pa kahang tuiga ang data base sa DOH? O di ba wa na lang unta ilisi ang mga pass. Gihugtan na lang unta pagpatuman ang mga protocol.
Taliwa ning mga palpak, angay bang kataw-an ug bugalbugalan ang administrasyon karon? Wa pay administrasyong miagi sa Siyudad nga nakasugat og ingon niani kadako ug kalapad nga krisis sa panglawas. Sayon ra kaayo ang pagpanaway.