POLICE Regional Office 7 migamit na og drones alang sa hugot nga pag- monitor sa mga residente sa barangay sa Dakbayan sa Sugbo nga taas og kaso og mga sa coronavirus nga molapas sa enhanced community quarantine protocol.
Ang Cebu City Police Office (CCPO) miapod-apod na og mga drone sa ilang 11 ka police stations alang niini.
Matod ni Police Brigadier General Albert Ignatius Ferro, hepe sa PRO 7, nga mao kini ang gihimo sa kapulisan sa Metro Manila nga epektibo.
Iyang gipasabot nga kon mabantayan sa drones nga adunay mga residente nga naghimo og mass gatherings ug wa motuman sa social distancing ug pag sul-ob og mask, dakpon sila sa pulis.
“If we see that there are a lot of people who are not following our instructions, our mobile our patrol mosugod didto. So, atong mga kaigsuonan diri sa Sugbo, be careful if you are trying to violate the ECQ, you are very much monitored by our drones,” matod ni Ferro.
Niadtong miaging semana, ang Special Action Force (SAF) nga gipadala sa Dakbayan sa Sugbo, nagpalupad usab og 11 ka drones hinungdan nga adunay siyam ka mga tawo nga nadakpan sa A. Lopez sa Barangay Calamba nga nakalapas sa protocol sa ECQ.
Laing 13 usab ka drones ang gipang-isyu sa 11 ka police stations sa dakbayan nga maoy gamiton sa pagmonitor sa ilang mga hurisdiksyon.
Gisugyot usab ni Ferro sa Cebu City Hall nga mopalabang og ordinasahon nga mag-atubang og taas nga silot ang mga malapason sa ECQ.
“We are recommending to the city government of Cebu for a more stronger penalty for the violators of ECQ and other quarantine regulations,” dugang ni Ferro.
Dunay 12 ka mga barangay nga taas og mga kaso sa coronavirus disease (Covid-19) nga gipaubos sa mas estriktong lockdown.
Samtang makigtagbo si Ferro sa technical team sa Kagamhanan sa Dakbayan sa Sugbo aron hisgutan ang problema sa mga QR coded quarantine pass. (AYB)