GISUDLAN na og walo ka mga asymptomatic coronavirus disease (Covid-19) nga mga pasyente ang New Normal Oasis for Adaptation and a Home (Noah) Complex sa South Road Properties (SRP).
Agi kini og pagtuman sa sugyot ni Department of Environment and Natural Resources (DENR) Secretary Roy Cimatu.
Si Cimatu, overseer sa Covid-19 response sa Sugbo, nagtuo nga ang di maayong nahimutangan sa mga barangay isolation center (BIC) nga naa sa tunga-tunga sa mga komunidad, maoy usa sa mga hinungdan sa pagkuyanap sa Covid.
Iyang nahuna-hunaan ang paggamit sa 350-bed capacity nga Noah.
Si Jocelyn Pesquera, facility manager, nagkanayon nga ang maong mga Covid positive gikan sa Barangay Cogon Pardo (7), ug Basak Pardo (1) nga gidala sa Hulyo 1 sa gabii. Si Pesquera niingon nga way dad-ong mga pasyente sa pasilidad panahon sa adlaw aron di makamugna og kahadlok sa publiko.
Ang Noah maoy gihingusgan ni Bise Mayor Michael Rama nga matukod para maoy moatiman sa mga residente sa south district isip kaabag sa Cebu City Quarantine Center nga level 2 category.
Ang Noah makaatiman sa mga asymptomatic Covid positive samtang ang CCQC alang sa mga pasyenteng dunay mild to moderate nga kahimtang.
Si Pesquera nidugang nga adunay laing 400 ka tents nga gi-donate ang Aboitiz Power nga gikatakdang maabot karong Lunes, Hulyo 6.
Matod ni Pesquera, kinsa kanhi konsehal sa south district, gamiton nila kini para sa pagtukod sa ikaduha nga Noah.
Si Dr. Peter Mancao ang gitudlo isip medical director samtang si Dr. Ester Concha maoy welfare officer. Apil sa operation team si Dr. Daisy Villa, pangulo sa City Health Department, para sa maong pasilidad.
Sa Hulyo 2, 2020, ang CHD nitala og bag-ong 88 ka recoveries kun nangaayo sa Covid-19.
Duna say kompirmadong 150 ka mga kaso sa Covid-19 kansang swab tests gipahigayon gikan sa Hunyo 29 ngadto sa Hulyo 1, 2020.
Duna say natala nga 13 ka bag-ong namatay, usa niini niadtong Mayo pa samtang ang laing 12 puro sa Hunyo. (PAC)