PORMAL nang nadawat ni Ramon “El Presidente” Fernandez ang memorandum gikan sa Office of the President nga nagtudlo kaniya isip Officer-in-Charge (OIC) sa Philippine Sports Commission (PSC) niadtong Biyernes, Hulyo 3, 2020.
Si Fernandez, kinsa usa ka PSC commissioner, maoy gitudlo nga mangulo sa ahensiya sa paugnat sa kusog, isip temporaryong hulip ni PSC chairman William Ramirez, kinsa kasamtangang nag-leave.
“Upon the instruction of President Rodrigo Roa Duterte, and to ensure the continuous and effective delivery of public services, please be informed that you have been designated as Officer-In-Charge of the Office of the Chairman, Philippine Sports Commission for the period 22 June to 17 July 2020,” pamahayag sa memorandum.
Ang memorandum gipirmahan ni Executive Secretary of the Philippines Salvador Medialdea.
Si Fernandez, kinsa kanhi four-time Most Valuable Player sa Philippine Basketball Association (PBA), milarga paingon sa Manila niadtong Lunes, Hunyo 29, 2020, aron ipadayon ang mga proyekto sa PSC.
Nag-una sa iyang listahan ang pagtutok sa mga atleta nga nangandam nga maka-qualify sa 2021 Tokyo Olympics.
Sa kasamtangan, upat pa lang ka Pinoyng mga atleta ang naka-qualify sa event. (RSC)