HUMAN sa mga hagit nga iyang naagian gawas sa boxing ring, ang Bol-anong boxidor nga si Mark Magsayo andam na para sa bag-ong tahas sa gawas sa nasod.
Ang 25-anyos nga si Magsayo naabot sa Los Angeles International Airport niadtong Huwebes sa gabie, Hulyo 2, 2020 para ipadayon ang iyang training kauban ang inila ug multi-awarded nga boxing coach nga si Freddie Roach.
Si Magsayo mokombati og training sulod sa Wild Card Boxing Club sa Hollywood California, nga gipanag-iya ni Roach.
“I am so very grateful that I am going back to training with coach Freddie because I enjoy training with him and I am learning a lot every time,” sigon ni Magsayo sa report sa Ring TV.
Si Roach kanhi trainer ni 8-division world champion Manny Pacquiao ug nakatabang kini’g dako sa pagpanday sa boxing career sa figthing senator sa Pilipinas.
Uban sa iyang asawa nga si Frances, si Magsayo, kinsa adunay 20-0, 14KOs nga rekord, nisakay sa Korean Air flight gikan sa Manila Ninoy Aquino International Airport padung sa Incheon, South Korea. Nag-connecting flight sila sa South Korea paingon na ngadto sa Los Angeles.
Sa labing ulahi niyang away niadtong Agusto, 2019, si Magsayo, kinsa nagsugod og training ubos sa paggiya ni Roach niadtong Enero ning tuiga, milupig sa kanhi World Boxing Organization (WBO) bantamweight titleholder nga si Thai Pungluang Sor Singyu.
Si Magsayo kasamtangang naghupot sa No. 5 rating sa World Boxing Council (WBC), No. 4 sa International Boxing Federation (IBF) ug No. 11 sa World Boxing Association (WBA).
Dili sayon ang giagian ni Magsayo para makalupad sa gawas sa Pilipinas kay daghan ang restrictions tungod sa hulga sa coronavirus disease 2019 (Covid-19).
Kinahanglan pa mopagawas og guarantee letter si MP Promotions president Sean Gibbons para makalarga si Magsayo ug iyang asawa.
“The purpose was to get Mark here to get him adapted to working with Freddie Roach, to really start finally getting that break,” matod ni Gibbons.