DI NA magkinahanglan og food and medicine (FM) pass kon mosimba.
Kini ang gibutyag ni Davao City Mayor Sara Duterte-Carpio gumikan panahon sa modified general community qurantine (MGCQ) duna nay matigayong kasaulogan sa Santos nga Misa sa semana gawas sa adlaw'ng Dominggo.
Sa programa niini sa radyo sa 87.5 FM dcDR Biyernes, Hulyo 3, 2020, giingon ni Duterte-Carpio nga iampo og apil ang mosita nga awtoridad.
"Ingna ang mosita sa imoha: Mosimba ko i-ampo tika'g apil, di ko nimo paagion?" ingon ni Duterte-Carpio, kinsa gitumbok niini ang pagtubag sa gisita ngadto sa awtoridad nga mobabag ug mangita og FM pass.
Giingon sab sa mayor nga sa iyang tan-aw walay mamakak nga moadto lang gyud og simbahan.
"Wala man seguro mamakak na moadto siya'g simbahan pero di siya moadto? Magabaan gyud mo ana," ingon ni Duterte-Carpio.
Una niini, gisuspenso ang panagtapok sa simbahan sa bisan unsa nga sekta ilawom sa balaod sa Inter-Agency Task Force on Covid 19 diha Omnibus guidelines sa implementasyon sa community quarantine sa nasud.
Apan giingon sab sa mayor nga mas maayong magpundo lang una sa balay bisan pa og anaa na sa MGCQ ang siyudad. Mamahimo man kuno nga bisan sa balay lang mag-ampo.
Gipahimangnoan sa mayor ang katawhang Dabawenyo nga sa MGCQ di luagan ang mga regulasyon, sama lang gihapon sa general community quarantine, ang makanunayon nga paggamit og face mask, paghugas sa kamot gamit ang sabon ug tubig ug ang paglikay sa mga dapit nga dunay taas nga kaso sa Covid-19.