Davao City Chamber kompiyansa ekonomiya makabawi

TUNGOD sa hinay-hinay nga pagluag sa mga gipangdili sa quarantine sa Davao City, kompiyansa ang usa ka pangulo sa negosyante nga makabawi ra ang ekonomiya sa di madugay.

Gikanayon ni Davao City Chamber of Commerce and Industry, Inc. (DCCCII) President John Carlo B. Tria nga ang deklarasyon sa modified general community quarantine (MGCQ) dunay positibong impak sa ekonomiya.

Gidayeg sab niya ang paningkamot sa lokal nga kagamhanan ug uban pang mga ahensiya sa gobyerno nga mapugngan ang pagtakod sa coronavirus disease (Covid-19) nga nakatabang aron nga hinay-hinay nga makalihok ang katawhan.

Hingpit nang napaubos ang Davao City sa MGCQ sugod Hulyo 1 hangtud 15, 2020.

Base sa mga sumbanan gikan sa Department of Trade and Industry, kadaghanan sa mga negusyo gitugtan na nga makabalik sa 100 porsiyentong kapasidad.

Kadtong mga establisemento nga gidid-an nga makabukas atol sa general community quarantine balik na sa 50 porsiyento nga kapasidad depende sa matang sa negusyo, kon diin tanan kinahanglan nga mosunod sa protocol ug mga safety measures sa lugar.

Kini nga mga negusyo naglakip sa mga kan-anan, uban pang mga establisemento, salons ug barbershops, Pisonet ug internet cafes, fitness gyms ug tanang uban pang establisemento.

Bars, karaoke ug uban pang entertainment venues gitugtan na nga modawat og kustomer sa 25 porsiyento nga kapasidad.